Vawiin khan Mizoram Food and Allied Industries Corporation Ltd. (MIFCO) Chairman thar Pu PC Zoram Sangliana, MLA kaihhruaiina hnuaia  Board meeting hmasa ber, MIFCO Board of Directors meeting vawi 77-na chu a office chamber-ah neih a ni.

MIFCO Chairman chuan Board of Directors te lawmna thu sawiin MIFCO in hma a sawn theih nana theihtawp chhuah puiah a sawm a. MIFCO chuan a din chhan ang ngeiin loneitute leh thlai huan neitute thar chhuah sawngbawla, market-ah tun aia hlawk zawka an tharchhuah tihral a nih theih nan insiam thar a pawimawh hle tiin Mizoram sawrkar flagship programme NLUP nen tangrualin chak leh zuala tan lak an tum a sawi.

MIFCO hian zu zawrh phalna license pali an kawl mek zingah Millenium Centre –ah chauh a takin dawr an hawng thei a. He dawr hawn a nih atang hian sawrkarah Excise Duty cheng nuai 171, Import Fee cheng nuai 17.8 leh VAT cheng nuai 74.9 an chhung lut tawh a. Anmahni operating profit tlingkhawm hi cheng nuai 72 a tling tawh a ni.

Meeting ah  hian Industries, Horticulture, Agriculture, Finance leh NLUP Implementing Board aiawhte an tel a ni.