Mizoram Food and Allied Industries Corporation Ltd. (MIFCO) chuan vawiin chawhma dar 11:30 khan Mizoram Food Park warehouse-I, Chhingchhip-ah Tuikum Cluster hnuaia NLUP/RKVY Captive Farming of Passion Fruit (CFPF) beneficiary te hnenah G.I. Wire an sem a, Pu C.Lalruata, Chairman, MIFO chuan khuallian niin he hun hi a hmanpui.

Khuallian chuan beneficiary te fuihna thu sawiin MIFCO ten CFPS hmanga hma a lakna hi NLUP hotute pawhin tha an tiin an lung awi viau a, hei hi tihtakzeta Officers te leh VLMC ten an hna an thawh vang a ni a ti a, MIFCO chuan theihtawp an chhuah tak meuh avangin mipuite (Beneficiaries) lakah pawh beiseina sang tak an nei tih sawiin thahnemngaio taka thawhho a tul thu a sawi a, Sapthei chingtu ten an thei thar chhuah te hlawk zawk a hralh anih theih nan NLUP hotute leh Mizoram sawrkar pawhin hma a la mek a ni a ti bawk.

NLUP/RKVY Captive Farming of Passion Fruit (CFPF) hi sapthei tharchhuah tam lehzual anih theih nana sawrkar hmalakna thar a ni a, theitui sawngbawlna leh vawnthatna hmunpui (MIFCO Food Park) a raw materials phuhrukna tur a ruahmanna tha tak a ni.

Tuikum Cluster huam chhung khaw hrang hrang 11 atangin hian CFPF beneficiary 612 thlanchhuah an ni a, beneficiary te hi huan hectare khat aia zau nei theuh tura beisei an ni a, sapthei kung 2000 tal phun nung tura beisei niin kg 2000 tal thar chhuak vek tura beisei an ni, tanpuina sum hi an huan neih zau dan azirin Rs 1,20,000 /- thleng pek theih an ni.

Village Level NLUP Committee (VLNC) leh MIFCO Area Officer ten beneficiary te hmalakna a hmunah enfiahin an thirzai mamawh zat an chhuatchhuah sak atanga G.I Wire leh a phunna tur ban hi sem a ni a, December ni 15, 2014 hma hian thirzai 3000 semchhuah fel hman tum a ni.

GI Wire semna hun hi Pu Hrangtawna, managing Director, MIFCO in a kaihruai a, Pu Sangzuala, General Manager, MIFO in lawmthu sawi a hnu a khar hnu ah MIFCO Complex Gate, Chhingchhip atangin Khuallian hian heng GI Wire leh a ban phurtu motorte hi a vailiam a ni.