Chhingchhip leh Sairang-a MIFCO thei sawngbawlna te chu NLUP sum hmanga thuam that leh tih changtlun an nih tak avangin a hma aia let tam takin an thei mamawh a sang tawh dawn a. Chhingchhip-a MIFCO thei sawngbawlna in a mamawh zat thei supply a hmuh theih nan NLUP Implementing Board (NIB), MIFCO, Horticulture department, NABARD leh National Horticulture Board, Govt. of India te chu hmalak dan tur ngaihtuahin vawiin khan Agricuture Committee Room-ah an thu khawm.

Sawihona hi NIB Vice Chairman, Pu P.L.Thanga’n a kaihruai a. Shimla Hills Offering Private Limited (SHOP Ltd) leh MIFCO te insumdawn tawnna turah MIFCO chuan thei sawngbawl tur tam tawk a mamawh avangin thei ching tur khua thlan chhuah a tul tih a sawi a. Tun hma lama thei huan siamtu te leh MIFCO ten harsatna an lo tawh te leh tuna harsatna awm thei te ngun taka ngaihtuah chungin ruahmanna siam tur te sawiho a ni a. Tuna MIFCO khawl chawm tur hian khaw 14 chu NLUP hnuaia Sapthei chinna khua atan dah tum a ni a. Kut hnathawktute tih phur nan leh zirtirna tura Motivation campaign leh seminar/workshop buatsaihna tur pawh National Horticulture Board chuan a rawn tum thei vek dawn a ni.