4181/2023-2024

Dated Aizawl, the 15th March 2024: Vawiin khan Food, Civil Supplies & Consumer Affairs Department hmalaknain, Conference Hall, Directorate of Economics & Statistics, MINECO-ah World Consumer Rights Day, 2024 hman a ni a, Food Civil Supplies & Consumer Affairs Minister Pu B. Lalchhanzova chu khuallian niin, he hun hi a hmanpui a ni.

 Khuallian Pu B.Lalchhanzova chuan thu sawiin, World Consumer Rights hman a nih chhan leh a pawimawhnate, Mizoram Sawrkar hnuaia Consumer Awareness Campaign kalpui mek a nih dante a sawi bawk. Minister chuan Artificial Intelligence (AI) awmzia sawifiahin, heng khawl thiamnate hi Consumer te’n tangkai takin an hmang thei dawn tih a sawi. Consumer rights hi midang tana dah bik loin, mitinte hian Consumer an nihna an chian a pawimawh a ti a, Consumer an nihna anga an dikna leh chanvote hre chiang turin a chah bawk. Kalkhawm mipuite hnenah Pu B. Lalchhanzova chuan Mizo mipuite chu Consumer awareness chungchangah than harh a ngaih thu leh nasa taka mimal leh pawl ang pawha Consumerte hamthatna ngaih pawimawh deuh deuh a tul thu a sawi a, chu chu kalkhawm mipui zawng zawngte mawphurhna a ni a ti. Minister hian Consumer Protection Act, 2019 danin a phut angin Consumers-te thubuai/ hlabuai rem turin Mizoram pumpui huap State Consumer Disputes Redressal Commission din a nih tawh thu a sawi bawk a ni. Mipuite chu ngaihtuahna thar lo chhuak zelte chu dawngsawng a, pawm thiam turin a fuih a, Sawrkar pawhin Consumer te’n dikna leh chanvo an neih theih nan theih tawp chhuah zel an inhuam thu a sawi bawk.

World Consumer Rights Day, 2024 hmanna hun hi Prof. Chawngsailova, President, Consumers’ Union ( MCU) chuan kaihruaiin, Pi Zodingpuii, Secretary, FCS & CA Dept chuan he hun hmang tura lo kal mipuite hnenah lawmna leh duhsakna thu a sawi a, World Consumer Rights Day lo pianchhuah dan leh a than chhoh dante a sawi lang bawk a ni.

Tunkum thupui (Theme) atan “Fair and Responsible AI for Consumers” thlan niin, he thupui hmang hian Robert Lalramhluna, PhD Scholar, NIT Mizoram chuan Artificial Intelligence (AI) awmzia te, a pawimawhna leh Consumers-te hamthatna atana hman tangkai a nih theih dante Power Point hmangin a sawi zau a ni.

Pi Saizikpuii, Director, FCS&CA Dept chuan kalkawm mipuite hnenah lawmthu sawiin, he hun hi tihtawp a ni. Mizoram chhunga District headquarters zawng zawng-ah World Consumers Day, 2024 hmanna hi neih bawk a ni.