4182/2023-2024

2024 Vau thla ni 15: Vawiin khan Government Lawngtlai College Hall-ah consumer-te dikna leh chanvo inzirtir tharna ni, World Consumer Rights Day, 2024 pualin hun hman a ni a. Lawngtlai District Bawrhsap Pu Cheemala Siva Gopal Reddy chu Khuallian a ni.

Pu Cheemala Siva Gopal Reddy chuan India ramah dan hmangin consumer-te dikna chanvo humhalh tlat a nih thu sawiin, thil lei leh zawrh chungchanga dan bawhchhia an hriat chuan District Consumer Forum hnena thlen vat turin kal khawmte chu a chah a. Tun lai khawvelah finna nei khawl siam chawp (artificial intelligence - AI) a larin, sumdawnna leh hna thawhna kawng hrang hrangah hman a ni tawh tih sawiin, AI hmanga thil lei leh hralh kalpui a tam avangin consumer-te'n tun lai thiamna ngaihven a, fimkhur thiam a ṭul hle a ni, a ti a. Khawl nung (online) hmanga indawrnaah hmaichhana indawrna a nih loh avangin inbum a awlsam tih sawiin, online-a sum khawih chet chungchangah fimkhur tur te, rual pawlna khawl (social media) hman kawngah pawh fimkhur tur te'n kal khawmte chu a chah a ni.

He hun hi Lawngtlai District Consumer Protection Association (DCPA) President Pu B. Lalhuma'n a kaihruai a. Lawngtlai DCPA General Secretary Pu LH Biaksangzuala hnen aṭangin consumer-te chanvo hrang hrang leh consumer-te'n an chanvo an humhalhna kawnga Mizorama thil thleng ṭhenkhatte, DCPA chungchang leh an hma lak dan te ngaihthlak a ni a. Kumin World Consumer Rights Day thupui, "Fair and Responsible AI for Consumers" tih hmangin Pu Jeffrey Zothanpuia Colney, Inspector of Legal Metrology, Lawngtlai chuan thu sawiin, artificial intelligence chu consumer-te tana ṭangkai taka hman theih a nih dan leh dik taka hman dan tur te a zirtir a. Lawngtlai DCSO office-in consumer rights chungchang video an buatsaih thlir ho a nih bakah, Govt Lawngtlai College zirlaite'n lemchan tawi an entir bawk a. Lawngtlai DCSO & Registrar, District Consumer Disputes Redressal Commission Pu Lal Rinsanga chuan lawm thu sawiin hun a khar a ni.

He hunah hian Lawngtlaia sawrkar official-te, consumer protection association leh tlawmngai pawl hrang hrang ai awhte an kal khawm a ni.

Khawvel pum huapa consumer-te dikna humhalh tura hma latu inzawm khawm pawl, Consumers International bul tumin kum 1983 aṭang khan March ni 15 hi World Consumer Rights Day atan hman ṭan a ni a. Kum 1962 March ni 15-a khatih laia US President John F. Kennedy-a'n US Congress-a "consumer-te dikna chanvo humhalh chungchang" a sawi aṭanga consumer-te chanvo humhalh tura hma lakna lo lian chho zel a nih avangin, March ni 15 hi World Consumer Rights Day atana rawt leh hman a ni.