2229/2022-2023
Aizawl the 7th October, 2022 : Vawiin khan National Commission for Scheduled Tribes leh Mizoram University te tangkawp buatsaih 'Contribution of Tribal Heroes in Freedom Struggle' tih thupui hmanga buatsaih chu Social Welfare & Tribal Affairs Minister Dr. K.Beichhua hmanpuiin he hunah hian khuallian a ni.

Khuallian Dr. K.Beichhua chuan Mizoram University te chungah leh NCST te chungah programme hlu tak an buatsaih avangin lawmthu a sawi a. Mizo Lalnu Ropuiliani'n British awpbehna duhlo a a nunna hial chantu hriatrengna Kelsih-ah Ropuiliani Museum chu cheng nuai sangkhat zariat sengin sak mek a ni thu a sawi a; Social Welfare & Tribal Affairs department kaltlangin thawk mek a nih thu leh Ministry of Tribal Affairs atanga sum hmuh atangin Tribal Research Institute Kelsih-ah vek, cheng nuai sanghnih sawmhnih vel senga sak a nih thu a sawi a. Khuallian chuan hmasang atangin tlangrama cheng tribal hnam te chuan kal dan bik leh eizawn dan bik an lo neih tawh thin thu sawiin India rama Tribal zingah Santhal Rebellion, Khasi Rebellion, Naga Movement leh adangte chu history a lang reng tur a nih thu sawiin, India ram in tun dinhmun a thlen theih nachhan leh ram ropui a nihna chhan chu heng zalen na lo sual tu te vang a ni tih sawiin India ram chu hnam hrang hrang insuihkhawmna ram a nih avangin inlungrualna leh inremna awm zel se tiin a sawi a. Zalenna hi mihringte nunah a pawimawh em em ang hian, ramin zalenna a neih hian kan thinlungah zalenna hlutzia hriatchian tumna te leh zalenna sualtute zahna chang hre turin zirlai, thangthar te a chah a. Thangthar te tan ram leh hnam inpumkhatna ngaih pawimawh chu zahawmna a nih thu a sawi a ni.

He hunah hian Minister chuan Exhibition of Contribution of Tribal Heroes in Freedom Struggle a hawng nghal a, he exhibition chungchang leh India in British awpbehna atanga zalenna a sual chhuah kawnga India ram chhunga Tribal zinga zalenna sual tu hrang hrangte sawiin leh India ram chhunga British sawrkarin Tribal chunga dan an lek kawh hrang hrang tarlanna chu Sh Kedar A Kulkarni, Akhil Bhartiya Vanvasi Kalyan Ashram hnen atanga ngaihthlak a ni a.

Prof. Lalngurliana hnen atangin Ropuiliani, a pasal Vandula Sailo leh a fapa Lalthuama chanchin te, Mizo Lal hmingthang unau Kalkhama leh Lianphunga chanchin leh Changri Valley an run thu leh Vailian Vawi Hnihna (1888-1889) te, Fanai Lal Zakapa leh CS Murray(Marliana) chanchin leh Mizo Lal ten British awpbehna duhlo a an do let dan te ngaihthlak a ni.

Pu Konthang Touthang, Joint Secretary, NCST hnen atangin Role of NCST ngaihthlak a nih bakah India rama Tribal te humhalhna dan hrang hrangte thlirhona leh sawihona neih a ni a. MZU Vice Chancellor Prof. KRS Sambasiva Rao hnen atangin thusawi tawi ngaihthlak a ni a, Dr. R. Zonuntluanga Joint Registrar chuan lawmthu sawiin he hun hi a khar a ni.