2230/2022-2023
Lunglei the 7th October' 2022: Vawiin khan Convention Centre, Lunglei ah Deputy Commissioner Office buatsaihin Right to Information Week (RTI) 2022 hawnna hun hman a ni. Lunglei Bawsrhsap Pu Kulothungan A, IAS chuan khuallian niin a hmanpui. He hun ah hian Lunglei District huamchhunga DAA, SAPIO, SPIO leh RTI Practitioner te an tel a ni.

RTI Week 2022 hawnna hun hi Pu Donny Lalruatsanga, Addl. Deputy Commissioner, Lunglei chuan kaihruaiin khuallian Pu Kulothungan A chuan mipuite rorelna sawrkar (Democracy) leh RTI chu thil kal kawp tlat a ni tiin sawrkar hmalakna leh hnathawhte hriat chu khua leh tuite chanvo a ni, a ti a. RTI Act hi ramchhung state dangte aiin Mizoram ah kan la hmang tlem hle a, a tangkai tur anga mipuiten an chhawr thiam theih nan inzirtirna chak tak kalpui chhoh zel a tul a ni a ti. Suo Moto Disclosure under Section 4 ngaih pawimawh a tul thu sawiin Department website ah te Department hmalakna hrang hrang te mipui hmuh theih tura chhawp chhuak thin turin a chah a ni. Mizoram Information Commission ah zualkona a thlen tlem thu sawiin SPIO ten an tih tur tha taka tiin hun tiam chhungin information an pek chhuah theih thin avang a ni, a ti a. SAPIO leh SPIO te chu an mawhphurhna pawimawhzia hria in tha taka RTI zawhna te chhang thin turin leh he dan kenkawh kawnga an hriat fiah duh te pawh Mizoram Information Commission ah zawt hreh lo turin a chah a. RTI Act chu sorkar langtlang leh mawhphurhna hlen thei awm theihna tur a ni tiin dan tha tak hi hmang tangkai tur leh a nih dan tur taka hmangtur chuan a hman dan tur kal hmang chiang taka hriat theuh a tul a ni a ti. RTI Act hmanga zawhna dawngtu department te pawhin RTI Act dah pawimawhin a hun bituk chhung ngeia zawhna chhang thin turinkalkawm te a chah a ni.

District Resource Person Pi Mary Lalromawii, Associate Professor, Department of Economics, Govt. J. Buana College, Lunglei chuan RTI Act chungchang sawiin India ram hi mipui sorkarna , Democracy ram a ni a, mipui aiawhten mipui tan dan an siam a ni. Mipui sawrkarna a lo hlawhtlin theihnan mipui ten sawrkar hnathawh leh thawhdan an hriat a ngai a, chumi atan chuan sawrkar hnathawh leh thawh dan hi zep loh, thup lo leh hmuh theih anih a ngai a ni. Tun hmaa kan sawrkar kalphungah khan mipuite tana office hnathawh leh thawh dan chu mipuite hriattheih loh a ni fo thin a, hei hian a ruka thil tih ati awlsamin sawrkar hnathawkte ah thil diklo tih ati awlsam ta bik a, nihna leh dinhmun hmansual a awlsam phah ta bik a ni. Sawrkar hnathawh leh thawhdan chungchang hi thup lo leh zep lo a nih a hmuh theih a lo nih chuan thilsual ti an tlem phah ang a, dan anga thil tih a lo tam zawk tawh ang. Hetiang dinhmun siam nan hian Right to Information Act hi mipuite hman leh inhumhim nan Parliament in a lo siam ta a ni. RTI Act in a tum ber chu sawrkar langtlang leh rintlak anih theih nan leh hlemhletna tihbo anih theih nan India khua leh tui tupawhin sawrkar dan leh pawisa hman dan thlenga a hriatduh a hriat theih nana ruahmanna siam hi a ni. Chu ruahmanna tihlawhtling tur chuan, Central leh State hrang hrangah Information Commission din a ni a. Departmental Appellate Authority (DAA), te State Public Information Officer (SPIO) te, State Assistant Public Information Officer (SAPIO)te pawh anmahni sawrkar hna pawimawh bakah heng dinhmun te hi chelh tur a ruat ani bawk. RTI Act hi October ni 12, 2005 atanga hman tan a lo ni ta ni. Mizoram ah chuan June ni 29, 2006 ah The Mizoram Information Commission chu din a ni a, July ni 5, 2006 atangin hna a thawk tan ve a ni. Mizoram RTI Online hi July ni 1, 2022 khan hawn a ni bawk. Information dil theitu te chu India khua leh tui zawng zawng an ni a, Information dil man Rs 10/- niin BPL tan dil man chawi a ngai lo a ni a ti.

RTI Week hawnna ah hian zawhna leh chhanna hun hman a ni bawk.