2231/2022-2023
Aizawl 7th October 2022: Tun hnaia Havildar atanga Sub-Inspector (AB)-a kaisanna tura Departmental Test, ni 19th - 26th September a neih chungchangah, ni 3rd October khan thu rintlak tak kan dawn angin hmeichhia pakhat, phone number- 9366714458 hmang chuan PTS, Thenzawl atanga candidate pakhat chu phone-a biain Rs. 2,00,000/- a pek chuan hotu lian thenkhat hmelhriat tha a neih avangin Sub-Inspector rank-a promotion chu a hmu ngei ang tih a tiam a. Head Constable hian Pawisa a neih loh thu a hrilh pawhin, a GPF Account atanga pawisa lakchhuah chungchangah pawh a puih theih vek thu a hrilh a ni.

Hei hi dan bawhchhiatna lian tak a nih avangin Cyber Crime Police Station (CCPS) Case No. 90/22 Dt. 04.10.22 u/s 417/420 IPC ziahluh a ni. Sec. 46(4) Cr.PC hmanga Magistrate phalna lak anih hnuah man nghal niin, thu zawhfiaha statement te lak niin, chhui chian zui mek a ni.

Hei bakah hian rank hrang hrangte promotion na tur exam neih a niin neih a la ni zel dawn a, hengah hian langtlang leh fair taka exam theihna turin fimkhur thei ang bera ruahmanna siam a niin, an tihthat dan indawtin result pawh siam thin a ni. Heng Departmental Test neih chhung hian thlalatu engemawzat ten an thiltih engkim hi video-in an record vek thin bawk a ni.

Hei hi chhui anih hnuah hemi hian mi buma pawisa siam turn mai a ni tih hmuhchhuah a ni a. Hetianga bumna hmanga sum siam turn te leh rintlak loh taka thil tithei nia insawite lakah mipuite fimkhur turin kan inchah a, hetianga mi bum turn hria kan lo awm a nih chuan rang taka Police-te min hrilh hre vat turin mipuite kan ngen tak meuh meuh a, police hnena thu thlentute thup tlat a ni ang.