2232/2022-2023
Aizawl 7th October 2022: Nimin khan Ministry of Women and Child Development hnuaia Mission Vatsalya hmalaknain Sponsorship and Foster Care Approval Committee, Aizawl District chu an Chairperson Dr.Lalhriatzuali Ralte, IAS, Deputy Commissioner, Aizawl hovin DC Office chamber-ah Committee neih a ni.

He committee hian Sponsorship fund dawng tur Aizawl District chhung atangin naupang 72 thlangchhuakin, Foster Care fund dawng turin naupang 21 thlanchhuah an ni bawk.

Sponsorship hi naupang kum 18 hnuailam, harsatna hrang hrang leh retheihna avanga zirna mamawh, eitur leh damdawi hmanga inenkawl ngai, inenkawlna tur nei si lo te chhawmdawlna tur atana programme pakhat a ni a, hetianga naupang tanpui leh chhawmdawl ngai nia hriat naupangte chu District Child Protection Unit, Laipuitlang, Aizawlah report theih reng a ni.

Foster Care hi naupang inenkawltu chhungkaw mumal an neih loh a, chhungkaw dangin tha taka an lo enkawl lailawk hi a ni a. Tupawhin enkawltu mumal nei lo naupangte enkawl thei tur leh tanpui thei tura an inhuam chuan, District Child Protection Unit, Laipuitlang, Aizawlah zawhfiah theih reng a ni bawk.