Vawiin chawhnu khan Dr K Beichhua, Minister of state for Animal Husbandry & Veterinary department chuan Rural Animal Slaughter House, Mualpui a tlawh a, Pu C Lalmuanpuia, MLA, Vice Chairman, Veterinary & Fishery Board, Dr Hmarkunga, Director, AH & Veterinary department, Dr Lalnuntluanga, Joint Director leh Salem Veng Local Council hruaituten minister hi an tawiawm a, Rural Animal Slaughter House, Mualpuia thawktute nen a hmanhma fangin an hnathawh dan tlangpui te enho a ni a, Slaughter House tihchangtlun nana hmalak chhunzawm dan tur sawi hona hun hman a ni bawk.

Minister Dr K Beichhua chuan Aizawl chu khawpui thang mek a nih angin mipui eitur sa thianghlim mamawhna a san zel thu a sawi a, Slaughter House a ran kan talh te a lo tam chhoh zel avangin Slaughter House atanga bawlhhlawh chhuak pawh a pun belh zel thu a sawi a. Hemi avang hian khawtlang tana harsatna a awm loh nan bawlhhlawh sawngbawlna changtlung zawk ngaihtuah a tul thu sawiin, Rural Slaughter House Mualpui ram chhungah, khawtlang tana hnawksak lova Ran talh tur thlun khawmna hmun ruahman a nih tur thu a sawi bawk a ni.

Vawiin Rural Slaughter House endikna hun ah hian Dr Lalrinawma Khiangte, VO (MI) in ran talh hmaa endik a nih dan te, ran talh dan leh talh hnua endik leh a nih dan te sawi fiahin Slaughter House chhunga khawl hrang hrang hnathawh dan te entirna hun a nei a, Dr Lalnuntluanga Colney, Joint Director chuan Mizorama Slaughter House kan neih te tihchangtlun nana ruahmanna awm thei te sawi zauna hun a hmang a, slaughter house pawhna kawng thawmthat te, ruahtui khawlna tur siam te leh bawlhhlawh hal ralna, Incinerator leh Effluent Treatment Plant changtlung zawk bun a ngaih thu te sawi a ni bawk. Salem Veng Local Council member te pawhin he hunah hian Slaughter House atanga bawlhhlawh chhuak te chu khawtlang tan harsatna a thlen loh nan tha zawk a sawngbawl ni se an duh thu an thlen bawk a ni.

Kum 2018, April atanga 2019 March thleng khan Rural Slaughter House, Mualpuiah hian ran 7,730 talh a ni a, April 2019 atanga October 2019 thleng khan ran 4,077 talh a ni tawh bawk a ni.

Rural animal slaughter house,Mualpui hi ni 8, April 2013 a hawn a ni a, RIDF -XVI (NABARD) kaltlanga cheng Nuai 412.36 senga sak niin nikhatah vawk 100 leh bawng 100 khawl hmanga talh theihna tura ruahman a ni a. Veterinary Officer (meat inspection) 2 leh thawktu dang mi 6 ten enkawlin heng ran talh tur te hi Ante-mortem examination (An hriselna endik) hnuah chauh talh ṭhin an ni a. Postmortem examination tih leh hnuah mihring ei atan hrisel tawk lo leh him lo te chu hralh chhuah phal sak loh niin paih (condemned) an ni a, sa hrilsel ni a finfiah chauh te hnenah meat inspection certificate pekchhuah (issue) ṭhin a ni a man tlawm zawkin new market sa zawrh naah lirthei hmanga dahsak ṭhin an ni bawk a ni. Slaughter house a thawk tur hian natna in kaichhawn theih laka fihlim (TB test negative) te hnenah chuah Butcher licence siam sak an ni a, Butcher licence hi mi 40 bawr vel hnenah pekchhuah tawh a ni.