Sports Minister Pu Robert Romawia Royte chuan Central Ministry hrang hrang dawr kualin Union Sports Minister Chairman-na hnuaia All India Sports Ministers Conference ah a tel.

Tourism Minister ni bawk Pu Romawia Royte kut ah hian Ministry of DoNER hotute chuan Reiek Tourism Project Phase-I sanction-na Meeting Minute an lo hlan a, Minister chuan hun reilote chhunga Cheng nuai 560 sanction an tihfel avangin DoNER Ministry hotute chungah lawmthu a hrilh. MDoNER Guidelines tharah rawtna a lo thehluh tawh angin Sports chu ngaihpawimawh zingah telh an tum thu an lo hrilh bawk a ni. Mizoram State Games 2019 atana sum Cheng nuai 250 chauh Mizoramin a neih avangin Nuai 150 dang rawtna pawh Pu Roberta hian Union Secretary, Ministry of Tribal Affairs-ah thehlutin Union Secretary chuan an sanction tur thu Sports Minister hi a hrilh nghal bawk a ni.

Sports Minister Pu Robert Romawia Royte hian Union Sports Minister Kiren Rijiju pawh kawmin Mizoram Sawrkarin Sports tihhmasawn nana a hmalak mekna leh puih an ngaihna te a hrilh a. Tun hnaiah Mizoram sawrkar rawtna anga khelmual 4-a Phullem phahna an pawmpui thar avangin amah leh Sports Ministry chungah lawmthu a hrilh a Ministry dang dang atanga hmalaknate pawh an sawi dun a ni.   

Pu Robert Romawia’n a rawt angin Union Minister Pu Rijiju chuan Tokyo Olympics 2020 ah North East state Sports Ministers zawng zawngten Olympics chhim ho dan tur chu a tihsak tur thu a lo hrilh bawk a ni. Minister hian National Sports University Manipur a din thar a Vice Chancellor te, SAI Director General te pawh kawmin a ti tipui bawk.

Pu Robert Romawia Royte chuan Union Tourism Minister Pu Pahlab Singh Patel pawh kawmin Mizoram Sawrkarin DPR a lo submit tawh te sanction rang turin a ngen a, Mizoram tlawh vat tur leh Thenzawl Golf Course hawng turin a sawm bawk. Remchan lohna dang a awm loh chuan December thla tira Golf Course hawng tura Mizoram tlawh a tum thu a lo hrilh a, Mizoram Tourism hmasawnna tura projects te pawh sanction thuai an lo tum tur thu Minister hi a lo hrilh a ni.

Pu Roberta hian Urban Ministry pawh tlawhin Mizoram Sorkar rawtna anga Sports, ICT leh Tourism hmasawnna atana sum tam tham tak Mizoram tan an sanction avangin lawmthu a hrilh a ni.

Minister hian vawiin a Sports Minister Conference New Delhi-ah thu sawiin ram pum huap atan leh Mizoram bik atan sports tih hmasawnna tura atan rawtna engemaw zat a sawi a. Kum tir lama a lo ngen tawh anga Football Field 2 leh Hockey Field 1 Sports Ministry-in Mizoram a pek thar avanga lawmthu sawiin Fit Mizoram Movement leh Fit India Movement chungchangte, National School Games leh Khelo Youth Games inlak lawn dan turte leh Union Youth Affairs & Sports-in Infrastructure tam zawk dawng thei tura chutiang atana Budget Head thar siam a that a rinthu te a sawichhuak a ni.

Union Youth Affairs Secretary Pi Utma Chawdry pawh kawmin Mizorama NSS, NCC leh Bharat Scout & Guides chungchangte a sawipui a, Union Sports Secretary Pu RS Julaniya nen pawh inkawmna hun neiin Mizoram Governor thar Pu RS Sreedhan Pillai nen New Delhi-ah Tourism leh Sports lama Mizoram hmasawn dan tur sawi dunna hun an nei bawk a ni.