Vawiin khan South Tuipui Assembly Constituency bialtu MLA leh Health & Family Welfare Department, Higher & Technical Education Department leh Commerce & Industries Department changtu Minister ni bawk Dr R. Lalthangliana chuan Lunglei a rawn tlawh. Minister hi Pu J. Hmingthanmawia, Director Commerce & Industries, Dr H. Lalchungnunga, Director, DHS leh Dr T.Lalhmangaihi, Director, DHME ten Aizawl atangin rawn tawiawmin District Industries Centre (DIC), Lunglei, Skill Development Centre leh Lunglei Civil Hospital te tlawhin heng office-a thawktute nen inkawmhona hun an hmang a. He hunah hian Lunglei High Powered Committee Vice Chairman Pu Lawmawma Tochhawng hovin Lunglei District official-te leh Lunglei District MJA hruaitute an tel bawk.

Minister chuan Lunglei Civil Hospital-a CT scan khawl, Blood Component Separator Unit leh ward hrang hrang te, Trauma Centre ruahmanna tur hmun te, Staff Quarter sakna tur hmun te leh CMO Office-te tlawh kualin Health & Family Welfare Department official-te nen hmalakna kal mek leh hmachhawp hrang hrang te an sawiho a. Health & Family Welfare Department a thawktute hnenah fuihna thu sawiin Minister chuan an hna chu rawngbawlna pawimawh tak a ni tih hre reng chungin damlo te enkawl hna chu hmangaihna leh inpekna thuk tak nen kalpui thin turin a chah a. Damlo enkawl chu mihring nunna chunga rawngbawlna a nih avangin rui chunga damlo enkawl lo tur leh zuk leh hmuam leh ruih theih thil laka fihlim turin a chah a. Health & Family Welfare Department chu Department pawimawh berte zing ami anih angin thawktute mamawh hmanrua (equipments), building leh hmasawnna ruhrel (infrastructure) tih changtlun zel chu a ngaih pawimawh hmasak thu sawiin Department hotute chu an mamawhte a rang lama ziaka thelhlut turin a sawm a. Hriselna hi ram thang mekte tan hmasawnna tehfung pawimawh berte zing a mi a ni tiin Health Minister chuan hriselna kawnga hma kan sawn zel theihna tur leh awlsam zawka mipuiten damdawiina inenkawlna tha zawk an lo neih theihna turin Healthcare Scheme leh sawrkar laipui Pradhan Mantri Jan Arogya Yojana (PMJAY) kaltlangin chak taka hmalak a nih tur thu a tarlang bawk. Kalkhawmte chu rilru thar, ngaihtuahna thar nen theitawp chhuaha tan la turin Minister chuan a sawm a ni.

District Industries Centre (DIC) Conference Hall-a Commerce & Industries Department hnuaia hnathawkte meeting a neihpui naah Minister chuan kan ram economy hmawsawnna leh Gross State Domestic Product (GSDP) tihsan na kawngah Commerce & Industries Department chu a pawimawh takzet a ni, a ti a. Socio- Economic Development Policy (SEDP) hnuaiah Commerce & Industries Department kaltlangin nasa taka hmalak a nih tur thu a sawiin SEDP kaltlang hian thil siamna lam (Industrial Development) leh a siamsa hralhna lama (Trade & Commerce) hmalakna chak taka kalpui a ni dawn a ni, a ti. Bangladesh nena insumdawn tawnna hmun tur Kawrpuichhuah Trade Centre leh khawchhak lam nen insumdawn tawnna tur hmun te tih hlawhtlin ngei an tum thu a sawi bawk. Heng hmalakna hrang hrang te ti hlawhtling tur hian Department hnathawktute chu phur taka lo inbuatsaih turin a chah a. Minister chuan Lunglei Chanmari-a Skill Development Centre pawh tlawh nghalin tangkai taka he Centre hi chhawr zel a nih theihna turin Commerce & Industries Director, District Industries Centre (DIC) General Manager leh official dangte ruahmanna a siam pui.

Vawiin vek hian Saikuti Hall-ah Sawrkar thar Pathian hnena hlanna leh lawmthu sawina programme hman niin Minister Dr R. Lalthangliana, Minister Pu C. Lalrinsanga, Lunglei High Powered Committee Vice Chairman Pu Lawmawma Tochhawng, Lunglei South bialtu MLA Dr. K. Pachhunga leh Lunglei North bialtu MLA Dr Vanlaltanpuia ten thu an sawi a. Rev F. Ramdinmawia, General Secretary, BCM Serkawn in hunserh a hmang a.  Dr R Lalthangliana chuan Department hrang hrang kaltlanga hmalak an tum dan tlangpui sawilangin Lunglei chu Mizoram 2nd Capital anih angin Municipal Council din tura hmalak thuai a nih tur thu a sawi a. Agriculture, Irrigation & Water Resources leh Cooperation Department changtu Minister Pu C. Lalrinsanga pawhin thu sawiin Pathian leh mipuite duhsakna zarah thlan tlina a awm leh Minister dinhmun pawimawh tak luah thei dinhmuna a ding chu lawmthu a sawi a. Sawrkar official-te leh leh mipui tawiawmna nen a mawhphurna te tha taka hlenchhuah theih a in beisei thu a sawi a ni.

Attachment

  • Loading attachment...