765/2022-2023
Aizawl 3rd June, 2022 : New delhi a cham mek Dr. R Lalthangliana, Health & Family Welfare, Commerce & Industries, Higher & Technical Education changtu Minister chuan a department hmachhawp thil hrang hrang bawhzuiin sawrkar laipui a dawr chhunzawm.


Dr R Lalthangliana hian nimin chawhnu lam Union Finance Secretary Dr. TV Somanathan chu a office ah hmu in Mizoram State Health Care Scheme in harsatna a tawh mek chungchang a sawipui a, Asian Development Bank loan beisei mek Finance ministry lampanga chinfel la ngai awm te sawi langin, Finance Secretary hian theihtawp chhuaha a rang lama lo enfel dan a zawn tur thu a lo hrilh.


Hemi zawh hian Dr.Thangtea hian sawrkar laipuia ADB Loan buaipuitu ber Pu Rajat Kumar Mishra, Addl.Secy., Deptt. of Economic Affairs, Ministry of Finance chu a office ah hmu lehin Mizoram in Health Care Scheme October ni 1, 2019 atanga a kalpui thu leh Mizorama cheng mipui tamtakin an chhawr tangkai tawh dan te chipchiar takin a hrilh a, harsatna an tawhte leh a chinfel dan turte uluk takin an sawi dun a, Addl.Secretary hian lo ngai pawimawhin theihtawp lo chhuahpui a tiam a ni. He meetingah hian Pi Juhi Mukherjee, Director (ADB), Deptt.of Economic Affairs, Ministry of Finance pawh Pu Mishra a tel ve a ni.


Dr. Thangtea hian Pu Sarbananda Sonowal, Union Minister for Ports, Shipping and Waterways chu a pisa ah hmu lehin hetah hian Bangladesh nena Mizoram insumdawn tawnna atana Pu Tipu Munshi a hova tun kum April 2022 thla a an sawiho tawh Kawrpuichhuah – Thekamukh inkar inkalpawhna tur lei dawh tura tih chuan hun a la mamawh deuh dawn avangin tun atana lo hman lailawk tur cargo ship vessel (bungraw phur lawng tenau) mamawh a nih thu ziakin Pu Sonowal-a hnenah hian a thlen a. Lawng terminal tur pawh a tul ang anga hma an lo lak tawh thu a hrilh bawk a ni. Dr.Thangtea thu thlen ho hi Pu Sonowal hian lo ngaihpawimawh sakin Shipping lam hotu liante phone a be nghal a, a rang thei bera en fel a, Mizoramin a hman theih tur tawk lawng lo ngaihtuah sak turin a hrilh nghal a ni.


Nimin tlai lam deuh tawh khan Dr.R.Lalthangliana hian Mizoram House, Chanakyapuri-ah Pu SCL Das, Director General of Hydrocarbons leh IOC bakah ONGC leh oil exploration lama hotu lian pawimawh tak tak te kawmin Mizorama oil leh gas laih chhuah dan tur kum tamtak buaipui thin tawh, mahse a hlawhtlinna la hmuh theih si loh chu a vei thu a sawi pui a, COVID-19 dinhmunin reh lam a lo pan takah chuan ngawrh taka hma thar la leh tura sawmin, a rang thei ang bera a tak ram thlen a duh tak meuh meuh tawh tih Geology & Mining changtu Minister a nihna angin a hrilh hlawm a. A hranpain mithiam rual awmna team siam a, kumin furpui ruah tlak reh hnuah Mizoram geology leh mining expert te nen Mizoramah ngei en hova, zir chiang lehzual turin ruahmanna an siam nghal a ni.


Dr. R. Lalthangliana hian vawiin khan Dr.Krishan Kumar, Jt.Secretary, Ministry of Commerce & Industries leh Pu C.Vanlalramsanga, Economic Adviser leh Pi Renu Lata, Director (TIES) leh Pu Praveen Kumar, Director (Foreign Trade) border haat lampang khawihtute kawmin tun hnaia Bangladesh Minister in Mizoram a rawn tlawh tuma joint statement an lo siam tawh rang taka tih hlawhtlin chungchang an sawiho a ni. Ministerin Silsuri leh Indo -Bangladesh border hmun hrang hranga border haat te a rang thei ang bera hna thawh theih nana dan tur ngaihtuah nise a tih chu an lo ngaihpawimawh sak hle a, Central Empowered Committee (under the chairmanship of Union Commerce Secretary) hi tun thla chhung ngei a thukhawma, Ministerin a thil thlen ho hi ngaihtuah chhunzawm tura thu an dah tur thu an lo hrilh a ni.


Dr.R.Lalthangliana hi Pu Amjad Tak, IAS, Resident Commissioner, Mizoram House, New Delhi, Dr. Biakthansangi, CEO, Mizoram Health Care Scheme leh Pu Ronald Lalchhuanawma, Asst.Director, Commerce & Industries ten an tawiawm a ni.

Attachment

  • Loading attachment...