1409/2022-2023

Aizawl, 29th July, 2022 : Higher & Technical Education Minister Dr R. Lalthangliana chuan vawiin khan Rashtriya Uchchatar Shiksha Abhiyan thawh hnihna (RUSA 2.0) hnuaia cheng nuai 160 senga sak Academic Building thar Govt. J. Thankima College Central Campus, Bawngkawn-ah a hawng.

Hawnna inkhawmah hian Dr R. Lalthangliana chuan Govt. J. Thankima College in kum 30 hmel a hmu ta chu lawmawm a tih thu sawiin, kawng hrang hrangah hma an sawn zia a takin a hmuh theih a ni, a ti a. Thawktute tanrualna leh thahnemngaihna a ropui tih sawiin College changtlunna tur atana an inpekna chi hrang hrangte chu chhuanawm a tih thu a sawi a, anmahni sum thawhkhawma class room an sa te, College sum atanga Geography subject an hawngte leh an hmalakna dangte pawh a fakawm hle a ni, a ti a. Mizorama sawrkar college zingah Management zirna awmchhun a nih thu sawiin, Management course sawrkarin pawm sak tura an dilna pawh lo ngaihtuah chhunzawm a nih dawn thu a sawi bawk a ni.

Dr Thangtea chuan Govt. J. Thankima College-in NAAC assessment tum thumna nei tura an inbuatsaih mek naah duhsakna hlanin, Grade tha tak an hmuh theihnan fimkhur tak leh uluk taka inbuatsaih turin a chah a, College zirlai an pun chak dan a lo hriat thu sawiin kum 3 chhunga zirlai a let thawka tam an nei chu thawktute thawhrimna leh taimakna rah a ni, a ti a. Mizoram chhung khua leh veng hrang hrang 180 atanga zirlai kalkhawm an nih avangin zikchhuahna in ang lo tak tak an ni lehzual dawn a, zirlaite enkawl kawngah pawh ngaihtuahna sen nasat a tul dawn bakah inbuatsaih uluk a ngai thin hle dawn a ni, a ti.

Zirlaite fuihna thu sawiin Minister chuan an zirtirtute zah thiam turin a chah a, tumruhna leh taimakna nen khawvel hmachhawn turin leh a huphurhawm zawnga khawvel thlir lo turin a chah bawk a, thawihtawp chhuah a bei tang tangte tan khawi hmunah pawh dinchhuahna a awm tih a sawi a. Zirna kawnga intlansiakna an beihah a tawp thleng tura tan la tur leh mahni pawh inenkawl uluk turin a chah a, hrisel lohna leh vanduaina tawh vang ni lova inthlahdah vang leh insumtheih loh vanga a tawp thleng pha lo, nih tur ang ni pha lo nih hi a pawi  a ni a ti.

Vawiina hawn tak RUSA 2.0 Academic bulding hi March ni 9, 2019 a sak tan niin, COVID-19 vanga harsatna tawh a nih vangin a tira hun bithliahah sak zawh hman a ni lova, March ni 16, 2021 khan sak zawh a ni, Mizoram Technocrats Company (P) Ltd ten he building an sa a, chhawng hnih niin  ground floor hi 2766 sqft (41 x 83 ft) niin, first floor hi 2024 sqft (41 x 51 ft) a ni a, a vaia belhkhawm hian 4790 sqft a ni.

Ground floor ah hian classroom 4 (zirlai 48 lenna classroom 2 leh zirlai 32 lenna classroom 2) awmin first floor ah hian classroom 4 (zirlai 32 lenna) a awm bawk a, a zavai hian classroom 8, zirlai 288 len theihna tura duan a ni.

Lalhmingthanga College, Durtlang (1.4.1992 a din) leh J.Thankima College, Bawngkawn (9.9.1993) a din te chu Mizoram sawrkarin chhun finin kum 2002 khan deficit ah a hlang kaia, a hmingah Govt. J. Thankima College tih a ni a. 14.8.2007 ah Mizoram University hnuaiah permanent affiliation an hmu a ni. GJTC hian campus hmun thumah neiin Central Campus, bawngkawnah hian zirna in leh building pawimawh dangte a awm a, Southern Campus, GJTC hmun hlui Bawngkawn hi Girls’ Hostel-ah hmangin Northern Campus, Lalhmingthanga College hmun hlui, Durtlang hi Boy’s Hostel atan an hmang a ni.

GJTC ah hian subject 8 zirtir a ni a, kuminah hian zirlai 1050 awmin, Principal leh zirtirtu 40 leh thawktu dang 12 an awm mek a ni. Zirlai hi Mizoram chhung hmun hrang hrang bakah Manipur, Assam, Meghalaya leh Tripura atang an awm a, Myanmar leh Bangladesh atang pawhin zirlai an rawn kal a, zirlaite zingah tawng chi hrang hrang 21 hmang an awm mek a ni.

Academic building hawnna inkhawm hi Prof. JV. Nunchunga, Principal, Govt. J.Thankima College-in a kaihruai a, Dr Zarzoliana, Addl. State Project Director (RUSA) in thusawina hun a hmanga a, Er. Joshua Lalthakima, A.E., RUSA in technical report a pe a ni.

Attachment

  • Loading attachment...