1410/2022-2023

Kolasib dated 29th July 2022: Vawiin khan Govt. Kolasib College-a zirlai lut thar 234 lawm luhna hun hman a ni a. Pu John LT Sanga, Deputy Commissioner chuan khuallian niin a hmanpui.

Khuallian Pu John LT Sanga chuan Govt. Kolasib College chu district dang College nen a khaikhin pawh a zahpuiawm loh tak, hmunhma nei tha leh zirlai hlawhtling thahnem tak zir chhuah tawhna a nih thu sawiin College leh zirtirtute tihmingtha chhunzawm zel tur chuan zirlaite an pawimawh ber thu a sawi. Tum mumal tak nei a, chumi tihlawhtling tur a rilru nghet tak nei chungin College-a an hunte tangkai tak a hmang turin zirlaite a chah a. Nun uluk tak chungin leh malsawmna dawng tlak a an hun te hmang turin a fuih bawk a ni.

Deputy Commissioner chuan Social media hman chintawk hre turin leh zirlai an nih angin zirna pawn lam thil a inhmang tam lo turin zirlaite a chah a, College chu thiam thil thar chherchhuah nan te, inelna thianghlim hmanga thiamna tihpun nan te leh zirna hmanga finna tihpunna hmun a hmang turin a chah. 

Pu T.Zahmingliana, Principal, Govt. Kolasib College chuan zirlai thar te lawmna thu sawiin Govt. Kolasib College tihmingthatu nih tum theuh turin a chah a. Govt. Kolasib College chu zirna kawng a hlawhtlinna an chharna hmun a hmang turin zirlaite a fuih bawk a ni.

Zirlai thar lawm luhna hun ah hian NSS Volunteer of the Year Award 2021-22 lawmman Malsawmdawngliani hnenah hlan a ni a. Zirlai lut thar aiawhin Ricky Lalpekhlua’n lawmthu sawina hun hmangin Lalremthanga, Asst. General Secretary, Student Union  chuan thusawina hun a hmang bawk a ni. 

Govt. Kolasib College-ah hian zirlai 720 bawr vel awm mekin Subject hlawm 14 a awm a, zirtirtu 58 leh thawktu dang 18 an awm a ni.