754/2022-2023
Aizawl, 2nd June, 2022: New Delhi-a cham mek Dr R. Lalthangliana, Higher & Technical Education, Health & Family Welfare leh Commerce & Industries changtu Minister chuan thahnemngai takin sawrkar laipui a dawr chhunzawm zel.

Dr Thangtea hian nimin chawhnu khan Pu K Sanjay Murthy, Secretary, Deptt. Of Higher Secretary, Ministry of Education a hmu a, Mizoram University Southern campus chungchang thil pawimawh tak tak a sawipui a. Dr Thangtea chuan thil a inchiah rei tawh thu sawiin hmanhmawh taka chingfel thuai turin a thlen. RUSA mission chungchanga harsatna tawh mek te, RUSA zirtirtu Asst. Professor te hlawh (salary) vawiin ni thlenga pending la awm chungchangte, RUSA-3 tihhlawhtlinna tur atana chinfel ngai an la tifel thei lo chu a ngaihmawh thute Minister hian a hrilh a, Pu Murthy hian a theih anga en zui a tum thu a lo hrilh a ni.

Hei bakah hian RUSA Mission Director Pi Saumya Gupta, IAS leh Pi Kamini Chauhan, Jt.Secretary, RUSA te pawh an office ah hmu lehin RUSA chungchanga harsatna Mizoram in a tawh chungchang a sawipui leh a. Lengpuia NIT dinna tur atana thil la chinfel loh chungchangte pawh thlen lehin a rang thei ang bera tifel turin a ngen leh a, theihtawp chhuahpui an lo tiam a ni.

Dr. Thangtea hian nimin tlai lam khan Drug Controller General of India Dr. V.G.Somany chu a office ah hmu in, Mizoram atanga hmalak dan tur chi hrang hrang - damdawi chiangkuang mang lo leh damdawi thi tawh Myanmar ramri leh Bangladesh ramri dep lam atanga Mizorama rawn tawlh luh ruk leh hralh ruk (drug trafficking) chungchang a sawipui a, hemi chungchangah hian Mizoram chhungah ngei central team te hi lo kal a awareness leh training te pe turin Minister hian a ngen a ni. A tul anga hma lak zui a tum thu lo sawiin Mizorama drug administration kalpui dan chungchangah Drug Controller hian ruahmanna tha zawk leh thurawn tha tak tak Dr.Thangtea hi a lo pe a ni.

Vawiin chawhma dar 11:00 khan Dr. R.Lalthangliana hian Bangladesh High Commissioner to India Pu Muhammad Imran chu a office chamberah a tlawh a. Tunhnaia Union Minister of Commerce, Bangladesh Pu Tipu Munshi te nena border trade chungchang an sawi dunna a Bangladesh sorkar lamin an tihfel tur thil chi hrang hrang awmte chu Pu Imram hian a tul anga hma a lo lakzui tur thu Dr.Thangtea chu a lo hrilh a, theihtawp chhuah a hmalakpui a tum zel thu a lo hrilh a ni.

Hemi zawh hian Dr Thangtea chuan Home Affairs Ministry tlawhin Pu Piyush Goyal, Addl.Secy (NE) a hmu a, Kawrpuichhuah border trade chungchang sawipuiin hemi atana DPR Land Port Authority of India in an siam anga pawisa sanction rang turin a ngen a. Pu Goyal-a chuan hemi chungchangah hian an hotu sang (central sorkar thuneitute) lamin ti hlawhtling tura thutlukna an lo siam tawh angin harsatna awm lo turah a ngaih thu Dr.Thangtea hi a lo hrilh a, theihtawp chhuahpui a inhuam thu a lo hrilh a ni. Ani bakah hian Home Affairs Ministry a hotu pawimawh dang Pu Sunil Kumar Barnwal, Jt.Secretary(BM-II) leh Pu Ashish Kumar, Jt.Secretary (BM-I) chu a khawihtute tak an nih avangin an office ah a hmu leh a, Kawrpuichhuah atanga Thekamukh, Bangladesh inkalpawhna tur lei dawh chungchang chu rang taka hma la turin Minister hian a thlen leh a. Kawrpuichhuah tihchangtlunna tur atana DPR chi hrang hrang Land Port Authority of India in Home Affairs Ministry sanction tura an thehluh tawh, Addl.Secretary (NE), Home Affairs Ministry hnena thleng tawh chu anni pahnih hi a khawitu tak an nih angin bawhzui chak turin a ngen a, anni pawn theihtawp chhuaha tan an lak tur thu leh harsatna awm lutuk lovin an tih hlawhtlin thuai an inbeisei thu an lo hrilh. Siaha leh Lawngtlai District inkalpawhna tur atana Darzokai (Tuipui-D) motor lian kal theih lova, motor te chauh kal theia leidawh tur ruahmanna awm chu a buaithlak thu Minister hian a thlen leh a, hei pawh hi theihtawp chhuaha hmalakpui an inhuam thu an lo hrilh a. Mizoram a BRTF ten a hma atang tawha an lo ruahman tawhna en chungin mumal takin Mizoram sorkarin a tha tura an hriat angin hma la tha leh se, an hnenah a rang lama an thawn chuan theihtawp chhuah an inhuam thu Dr.Thangtea chu an lo hrilh a ni.

Dr. Thangtea hian vawiin tlai hian Union Minister for Ports, Shipping & Waterways, Pu Sarbananda Sonowal leh Union Finance Secretary, Pu T V Somathana te a hmu leh ang.

Dr.R.Lalthangliana hi Pu Amjad Tak, IAS, Resident Commissioner, Mizoram House, New Delhi, Pi Sangchin Chinzah, IAS, Director, Higher & Technical, Govt. of Mizoram leh Pu Ronald Lalchhuanawma, Asst.Director, Commerce & Industries Department ten an tawiawm a ni.