753/2022-2023
Lunglei 2nd June 2022: UD&PA Department hnuaia DAY-NULM buatsaihin vawiin khan Kabod Training Centre Hnahthial-ah Thla 3 chhung awh tur Puanthui zirna kalpui tan niin Pu Lalremruata Sailo, DUDO chuan hawngin "eizawnna tlak thiam thil kan neih theih nan Sorkar-in sum tam tak a seng a, tih mai mai a thiang lo" tiin trainee te chu theihtawp chhuah turin a chah a ni.

Tuna Puanthui zirna kalpui tur hi UD&PA Department Hnahthial-in Skill development training vawi 2 an kalpuina a nih thu Pu Lalremruata Sailo DUDO chuan sawiin "mitin hian sorkar hna kan thawk vek thei lova, kan mamawh intodelh turin eizawnna tlak thiam thil kan neih a ngai a ni. Chumi tur chuan sorkar pawhin sum tam tak sengin Skill development training a kalpui thin a, trainee te hian theihtawp chhuaha zir hi kan mawhphurhna a ni tih hi kan hriat ve reng a ngai" tiin punthui thiam chu eizawnna tlak a nih thu leh ti tak takte tan hlawhtlinna a awm thu a sawi bawk a ni. Thiamna leh taimakna chu Ram leh hnam humhalhna atana hmanraw tha leh tangkai tak a nih thu pawh Pu Lalremruata Sailo chuan sawiin "Mizoram hmun thenkhatah Mizo Mistiri lo chhawr tur an awm tawh mang lo te hi thil lawmawm tak a ni a, heti zawnga kan infuih thar fo leh tan kan lak reng a tul a ni" a ti. Chutihrualin mi hnuaia kan thawhin hun vawn dik leh mahni inthunun kawngah Mizo ten zirtur tam tak kan la neih thu leh chhuanlam ho te te siam kan ching thin chu 'sim' tul a tih thu a sawi bawk a ni.

UD&PA Department hmalakna zinga langsar leh pawimawh tak Faina leh Thianghlimna chu an awmna hmun theuha nunpui tlat turin trainee te chahin DUDO Hnahthial chuan "District thar kan nih anga bul tan chho kan nih avangin thawktu la indaih rih lo mah ila theihtawp chhuah zel kan tum a, kan tlemna hi chhuanlamah hman kan tum lo" tiin Puanthui zirtur te pawh hun remchangah Faina hnatlang neihpui an tum thu a sawi bawk a ni.

He hun hi Nl.Lalnunpuii, Project Coordinator, Kabod Inc Pvt. Ltd chuan kaihruaiin Puanthui zir tura thlante hi mi 30 niin a thlawn vekin zirtirna pek an ni ang a, an zirchhuah hunah an duh chuan bul an tanna tur Loan ngaihtuahsak an ni dawn a ni.