752/2022-2023
Kolasib dated 2nd June 2022: Vawiin khan Planning & Programme Implementation Department, Government of Mizoram leh State Institute of Rural Development & Panchayati Raj (SIRD & PR) te tangkawp hmalaknaa thingtlang khua hmasawnna leh intodelhna tur ‘Village Level Development Programme’ chu Kolasib District a Pilot Project atan a thlan Lungdaiah, Tuirial bialtu MLA Pu K.Laldawngliana, Vice Chairman Commerce & Industries Development chuan a hawng.

He hunah hian Khuallian chuan Pilot Project atan a Lungdai khua thlan a ni chu lawmawm a tih thu a sawi rualin, Department hrang hrang te nen inpawhtlang tak a thawh ho a tul dawn a ni, a ti a. Lungdai khua chu Pilot Project atan a hman a nih ang ngeiin entawn tlaka thawk turin a chah a, he Project hi a vilpui tur thu a sawi a. VLDP bultanna turin a thawhkhat nan Cheng Nuai 5 a hlan nghal bawk a ni.

Hawnna inkhawm hi Pu Lalhmunsanga Hnamte, Director SIRD&PR chuan kaihhruaiin, VLDP kalpuina tur hian Pilot project-ah Mizoram chhung District 6-a khua pakhat theuh thlan chhuah an ni a ti a, chung zingah chuan Kolasib District-ah Lungdai chu thlan niin, khaw mil zela hmasawnna an kalpui tur zingah Lungdai khua ah chuan Tui chhek khawl bak ah Vawk vulhna hmun tih changtlun te an kalpui dawn a ni, a ti.

Pu H Lalengzauva Research Officer, PPI Dept. chuan VLDP kalpui dan a sawifiah a, Sialam khua, Aizawl District-ah handloom; Sekhum khua, Lunglei District-ah khuai khawi leh balhla chin; Chawngtlai khua, Khawzawl District- ah handloom; Ailawng khua, Mamit District-ah tourism and livelihood; Leng khua, Serchhip-ah irrigation canal hmalakna (Entry Point Activity) te kalpui a ni dawn a ti a; heng EPA kalpuina tur atan hian cheng Nuai 10 theuh pek an ni dawn a ti.

Pu C Lianhmingthanga VCP chuan EPA an thlan chhuah dan a sawifiah bakah kalpui chhoh zel an tum dan te a tarlang a; Pu R Lalduailova Village Development Committee (VDC) Member chuan lawmthu sawina hun a hmang bawk a ni.

Hawnna inkhawm neih zawhah hian Pu ZR Thafala, Principal Extension Training Centre SIRD&PR Kolasib kaihhruaiin Technical Session neih a ni a; Er. P Lalhunthara SDO Kolasib Irrigation & Water Resources chuan Tuihna humhalh leh chhawr tangkai dan sawiin, Pu Ramhluna Kawilam District Horticulture Consultant chuan Thlai chin dan chungchanga hriattur tul sawina hun hmangin, Dr Engkunga Chhangte, DVO Kolasib chuan Vawk vulh chungchanga hriattur pawimawh te a sawi bak ah sawihona te buatsaih a ni.

He hunah hian He hunah hian SIRD & PR, PPI, PHED, Thingdawl BDO, AH & Vety, Horticulture Department-a thawktute leh Lungdai khawtlang hruaitute bak ah NGO hruaitute an tel a ni.