1197/2022-2023
Aizawl 8th July, 2022 : New Delhi a cham mek Dr R. Lalthangliana, Health & Family Welfare, Commerce & Industries, Higher & Technical Education changtu Minister chuan a department hmachhawp thil hrang hrang bawhzuiin sawrkar laipui a dawr chhunzawm.

Minister hian vawiin chawhma khan sawrkar laipuia ADB Loan buaipuitu ber Pu Rajat Kumar Mishra, Addl.Secy., Deptt. of Economic Affairs, Ministry of Finance chu a office ah hmuin Pi Juhi Mukherjee, Director (ADB), Deptt.of Economic Affairs, Ministry of Finance pawh he hun ah hian a tel ve a. Dr Thangtea chuan Mizoram sawrkarin ADB loan cheng vaibelchhe 1004.7 a puk theihna tura theihtawp an chhuah avanga lawmthu sawiin, lawmthu sawina thilpek a hlan ve ve a ni. He hun hi remchangah la nghalin Minister hian Zoram Medical College (ZMC) tihchangtlunna tur project hrang hrangte rei tak an buaipui tawh thu sawiin, Finance Ministry lamin ahma an lak ve theih tur awm te a sawipui a, thahnemngai taka tan lo laksak tura a ngenna chu an lo ngaih pawimawh tur thu in an lo chhang a ni.

Hemi hnu hian Dr. Thangtea chuan Pu A. K. Pipal, Director, Ministry of Electronics and Information Technology (MEITY) chu a pisa-ah hmu in Mizoram chhunga zirna in sang - Colleges, Institutions etc., (Higher & Technical Education hnuaia mi) te bakah Hospital leh Public Health Centre (PHC) te Information Technology hmanga tihchangtlunna tur scheme hrang hrang MEITY in a neih te a sawipui a, a tul ang zela indawr chhunzawm turin thu an thlah bakah, Pu A.K. Pipal hian theihtawp chhuaha tan lo lakpui a inhuam thu Minister hi a hrilh a ni.

Minister hian Boeing Company office tlawh chhunzawm nghalin Pi Praveena Yagnambhat, Chief of Staff and Head (CSR) leh a thawhpuite nen an inkawm a, Boeing company in an CSR Fund atanga Mizoram tana hriselna endikna tur khawl man to chi hrang hrang a lo pek tawh te avanga lawmthu hrilhin Mizoram a PHC zawng zawngte tan ECG khawl leh Diagnostic Laboratory pek an tiam tawh chungchangte leh leh hmalakna kal mekte a sawipui a, Boeing hotute chuan Mizoramin hriselna kawnga hma a sawn theihna tura an hmalaknate chu tihhlawhtlin vek tumin theihtawp an chhuak mek tih lo hrilhin, technology thar hmang tangkaia thil dangah pawh hmalakna tur an neih belh tih an lo sawi bawk a ni.

Boeing Company office a tlawh hnu hian Dr R. Lalthangliana hian Union Minister of Commerce & Industries chu a pisa-ah hmu in one-to-one meeting a neihpui a, Dr Thangtea hian Mizorama Border Trade tihchangtlunna tur atana theihtawp a lo chhuah thinna ah Union Minister hi lawmthu hrilhin, Indo-Myanmar leh Indo-Bangladesh inrina hmun hrang hranga border haat din tura ruahmanna DPR Mizoram sawrkarin a thehluh tawh sanction awm har a tih thu a sawi nghal a, Union Minister hian hei hi lo ngai pawimawhin a personal branch a be nghal a, rang taka chingfel tura a tul anga hma la nghal turin a hrilh a ni.

Dr Thangtea hian Kawrpuichhuah ICP, Zokhawthar LCS leh Zorinpui LCS chungchang pawh sawipuiin, Kawrpuichhuah ICP tihchangtlunna tur DPR chu Cabinet meeting-a ngaihtuah tur nia a lan avangin leh a Ministry enkawl hnuaia hmalakna pawimawh a nih avangin Cabinet meeting neih hunah pawh theihtawp chhuaha tan lo la turin a ngen a, he DPR hi a hlawhtlin theihnan a kaihhnawih Ministry hrang hrangte inhmuhkhawm a tul thu a sawi bawk a, Union Minister chuan theihtawp chhuaha tan a lo lak tur thu a sawi a ni.

Dr R Lalthangliana hian nimin tlai khan Sunil Kumar Barnwal, IAS, Joint Secretary, Ministry of Home Affairs (MHA) leh MHA official pawimawhte a kawm bawk a, he inkawmnaah hian Minister chuan Kawrpuichhuah ICP tihchangtlunna tur DPR an kuta awm mek chu Mizoram tan mai bakah India ram tana a pawimawhzia sawiin, a hlawhtlinna pawh an kutah a innghat thu hle tih a sawi a, Mizoram tana ro tling tur he hmalakna hi tihhlawhtlin a pawimawhzia thu a sawi chu lo ngai pawimawhin MHA offialte chuan theihtawp an chhuah tur thu an sawi a, Cabinet agenda siam a ngaih dawn thu leh a tha thei ang bera an lo buatsaih tur thu Minister hi an lo hrilh a ni.

 Hemi hnu hian Pu Dr. Dharmendra Singh Gangwar, Secretary (Border Management), Ministry Of Home Affairs chu a pisa-ah hmuh chhunzawmin Dr Thangtea chuan Darzo Kai (Tuipui D), Hnahthial District a lei (bridge) thar changtlung zawk leh lian zawk dawhna tur chungchang kumin kum tir lama a lo thlen tawh chu a sawipui leh a, Lawngtlai District leh Siaha District te nena inkalpawhna tura atana kawng pawimawh lutuk a nih avangin harsatna siam lova a rang thei anga tihhlawhtlin sak turin a thlen nawn leh a ni. Hei bakah hian Indo-Myanmar leh Indo-Bangladesh ramri hrula kawngpui sial hna thawh mek chu tun aia chak zawka thawh a pawimawh thu a thlen bawk a, heng bakah hian Mizorama Border Trade Centre leh Border Haat chungchang a sawipui bawk a, Secretary hian theihtawp chhuah zel a tum thu a lo sawi a ni.

Union Healh Secretary Pu Rajesh Bhusan pawh tlawhin Dr Thangtea chuan nimin lama Union Health Minister hnena an thu thlen chungchangte a hrilh a, theihtawp chhuaha lo bawhzui sak turin a ngen bawk a ni.

Dr.R.Lalthangliana hi Health & Family Welfare Board Vice-Chairman Dr ZR Thiamsanga, MLA leh Dr Jane Ralte, Registrar, Zoram Medical College ten an tawiawm a ni.