1196/2022-2023
Aizawl, the 8th July 2022 : Vawiin khan Kawnpui a Awithangpa Hall-ah Kawnpui Field No 2 tihzauh leh Phullem phah hna tanna tur lungphum chu Sports Minister Pu Robert Romawia Royte-in a phum a, Tuirial Bialtu MLA Pu K. Laldawngliana, Pu TC Pachhunga, SEDP(Tourism and Sports) Board Vice Chairman leh mi pawimawh dang ten Sports Minister hi an tawiawm a ni.

Sports Minister Pu Robert Romawia Royte chuan Tuirial bial MLA Bye Election Campaign lai Nov 2, 2021 zingkara Kawnpui Field No 2 hmun ngeia Astroturf Football Ground kan phah ang tia kan lo intiamna chu Chief Minister zahawm tak Pu Zoramthanga zarah tihhlawhtlin a ni dawn ta chu lawmawm a tih thu sawiin Kawnpui leh a chhehvel khaw hrang hrang thalai te pawh an lawm hle tih ka hria a. Chief Minister Pu Zoramthanga kaihhruai Sawrkarah Zoram hmun hrang hrangah hmasawnna tam tak a awm mek thu sawiin SEDP Phase I hmangin chhungkua singruk chuangin hmasawnna rahbi thar an tuk chho tan dawn a, Phase I bakah hian SEDP Phase II pawh la sem chunzawm leh a ni ang a, SEDP dawngtu zawng zawng te dinchhuah nana hman tum turin ka fuih che u a ni, a ti.

Sports Minister chuan National Education Policy, 2020 hmangin zirna leh Sports kalkawppui thiam a pawimawh thu sawi langin Kawnpui Phullem phah zawh hunah pawh Zirna in hrang hrang ten tangkai taka an hman phalsak anih tur thu a sawi a. Minister chuan Kawnpuia Hockey Academy chu Khelo India Scheme atangin Hockey Centre Of Excellence atan thlan fel a ni tawh tiin, tihphuisui chhoh zel tum anih thu a sawi bawk.

Tuirial bialtu MLA Pu K. Laldawngliana pawhin thu sawiin MLA Bye Election Campaign laia a lo tiam tawh ang ngeia Sports Minister Pu Robert Romawia Royte leh Chief Minister zahawm takin Kawnpui Field No. 2 Phullem phahna an lo nawrchhuak chu ropui a tih thu sawiin Kawnpui leh a chheh vel te aiawhin lawmthu ka sawi a ni, a ti a. A satu tur Contractor leh Department official te pawhin tha taka an sak zawh a beisei tih a sawi bawk.

He Lungphum Function hi Dr. Lalrozama, IAS SYS Secretary-in kaihruaiin UN Millenium Development Goals pawhin hmasawn zel nan Sport a dah pawimawh tih a sawi a. Kawnpuiin Astroturf tha tak an nei tur chu a lawmpui tak zet tih a sawi.

He Field siam that dan tur leh sak dan tur chungchangah hian Pu John Tanpuia MCS Secretary Mizoram State Sports Council-in report a pe a. A sakna tur sum Cheng nuai zaruk chu Finance Ministry hnuaia Central Assistance to State For Capital Expenditure atangin February 2022-ah Sanction dawn a nih thu sawiin Field tihzauh te, Retaining wall siam te, Gallery, Pavillion, Security Fencing leh Phullem phah te thawh tur a ni anga, hna hi tan thuai tum a ni ang a ti.