1195/2022-2023
Champhai, the 8th July, 2022: India ramin zalenna a hmuh kum 75-na tlin hriatrengna leh lawmna kûtpui, Azadi Ka Amrit Mahotsav (AKAM) hnuaia Ministry of Environment, Forest & Climate Change (MoEF&CC) ruahmanna bawhzuiin vawiin chawhma dar 10:30 khan ramngaw siam tura thingphun kûtpui, Haryali Mahotsav lawmna pualin Nagar Van Area, Zote, Champhaiah District Bawrhsap Pu James Lalrinchhana hovin thingphun hnatlang neih a ni a. He hun hi khawvel boruak lum chho zel leh boruak bawlhhlawh zel tur ven kawnga thing leh kan vela hmun hring dup hmunte pawimawhzia inzirtir nana ruahman a ni.

Pu James Lalrinchhana chuan kalkhawmte Hariyali Mahotsav puala chibai bukin India ram hmun dang thlan bikte ruala Champhaia hun hman a ni chu lawmawm tiin, a hlawhtlin theihha tura hmalakna fakawm a ti a. Mihring, nungcha leh thlaite leilung luaha khawsa tlanga nungho tura duan kan nih thu sawiin, khawpui hnaivaia ramngaw Nagar Van-Urban Forest chu khawpui mamawh boruak thianghlim siamtu leh thlifimtu pawimawh tak khawpui chuap a nih thu a sawi a. Khawpui ramngaw chu hrisel nana a pawimawh avangin thingphun leh ramngaw siam kawngah tan kan lak a ngai a, kan tu leh fate thingphun uar sauh sauh tura kan zirtir tam a tul a ni, a ti a. Department khat maiin hmalakna a kalpui theih loh ang bawkin mipui tawiawmna tel lovin hmalakna kalpui tak tak theih a nih loh avangin District hmasawn zel nan inpawhtlang taka kal ho zel a tul a ni, a ti a. Bawrhsap hian Theihai tiak phunin Haryali Mahotsav thingphun hnatlang bul a tan a ni.

Pu Lalduhthlana, DFO Champhai chuan ram ngaw siam tura thing phun beihpui hapta Hariyali Saptah kaltlanga thingphun kûtpui Hariyali Mahotsav hman a nih dante leh khawpui ramngaw Nagar Van Project chungchangte a sawifiah a. Champhai Nagar Van hi hlawhtling turin sawrkar department peng hrang hrang, VC, NGO leh mipuite kan thawhho a pawimawh dawn hle a ni, a ti a. DFO chuan India ram pumah kum 2020-2021 atanga 2024-2025 chhungin Nagar Van 400 siam tum a nih thu leh, tunah hian State 26 ah 173 siam tawh a nih thu a sawi bawk.

He hun hi Pu RC Rodawla, Zote VCP chuan a kaihruai a. Pu Jonathan Lalhruaitluanga, RO, Champhaiin thingphun hnatlang neih dan tur a sawifiah hnuah lawmthu sawiin hun a khar a, thingphun hnatlang neih chhunzawm nghal a ni.

India ram zalenna kum 75-na lawmna kalzelah vawiin July ni 8, 2022 hian India rama Nagar Van 75 leh Plantation Site 75 thlan chhuahahte a rualin thingphun runpui neih a ni a, hun hman dan hi internet lamah thlir theiha pholan nghal zel a ni bawk a. Vawiina Champhai Zote Nagar Van hmuna thingpui rual vek hian Tlangsam, Hmunhmeltha leh Zote rama NEC Plantation Site-ahte thingphun runpui neih a ni bawk a. Vawiin Haryali Mahotsav pual hian Theihai, Theifeimung, Lumler, Theiarlung, Ngiau, Paivun, Thingsen leh Tlaizawng tiak 1,030 phun a ni a, hnatlang hian mi 185 an chhuak a ni.

Vawiin Hariyali Mahotsav hmanna hmun Nagar Van-Urban Forest Champhai hi khawpui ramngaw, mipuite tan boruak thianghlim pe chhuaktu tur, tuihna siamtu tur, lenkhawthawnna leh thil zirna tana ramngaw humhalhna hmun a ni a. Khawtlang hruaitu, NGO, mipui vantlang leh sawrkarten tangruala thawhhona tha tak nen khawpui ramngaw tha din leh humhalh hi a tum a ni a, Nagar Van scheme hnuaiah hian khawpui ramngaw ven him nana hung, a tulna laia thing phun belh, vantlang remchang siamte a tel a ni. Mizoramah tun dinhmunah Aizawl leh Champhaiahte khawpui ramngaw siam hmalakna Nagar Van Project hi kalpui a ni.

Nagar Van Champhai huam chhungah hian thing thawl deuhna laiah thing chi hrang hrang- Theihai, Theifeimung, Avocado, Pear, Theifarbang, Lamkhuang, Thingthupui, Khuangthli, Lenhmui, Tlaizawng, Chawmzil, Tei, Ngiau leh Char tiak 2000 vel phun tawh a ni a, phun mek zel a ni bawk.

Vawiin Hariyali Mahotsav puala hun hmanah hian Green Mizoram Committee, Champhai member-te, Forest Department thawktute, Zote VC, YMA, MHIP, MUP leh Champhai Nature Conservancy (CNC) member-te an tel a ni.