736/2022-2023
Aizawl, 1st June, 2022 : Dr R. Lalthangliana, Health & Family Welfare, Commerce & Industries leh Higher & Technical Education changtu minister chuan a department chan kaihhnawih thil pawimawh chi hrang hrang sawrkar laipuia bawhzui turin nimin khan New Delhi-a thleng.

Dr Thangtea hian nimin tlaia New Delhi a thlen veleh Land Ports Authority of India (LPAI) Chairman Pu Aditya Mishra, IPS chu a office ah hmu in, hetah hian Pu Sanjiv Gupta, Member Planning LPAI pawh a tel a, Minister hian tun hnaia Bangladesh Union Commerce Minister Pu Tipu Munshi-a’n Mizoram a rawn tlawh tum a Kawrpuichhuaha Border Trade (Integrated Check Post) an sawi dun chungchang leh hemi hmuna border trade dinna tur atana rang taka hmalakna tur pawimawhte a sawipui a. LPAI lam hian DPR engkim mai tha takin an lo peih fel vek tawh a, a copy te pawh Dr Thangtea hi an lo entir a ni.

LPAI in DPR an siamah hian passenger terminals te, trade terminal building te, officers & staff quarters te, administrative building te engkim mai felfai deuhin an lo telh dim diam a, chung chu Ministry of Home Affairs lama sanction turin an lo thlen fel tawh nghe nghe a ni. Hemi chungchang bawhzui hian Dr Thangtea hian vawiin khan Home Affairs Ministry hotute pawh nghalin rang taka lo enfel pui turin a thlen a ni.

Dr.Thangtea chuan a hovin Ministry lama senior officials te leh Bangladesh Commerce Minister te nen a remchang hmasa berah Bangladesh lampanga an hmalaknate tlawh turin LPAI hotute hi a relpui a ni.

Nimin tlai vek khan, RIPANS, Zemabawk-a hmasawnna hna thawh mek chungchangah a hnathawktu HITES Ltd. hotute chu Dr Thangtea hian Mizoram house ah a ko a, hmasawnna hna thawhna tura ruahman Rs.480 crores lai kum 2020 kum tir lama sawrkar laipuiin an rawn sanctioned tawh chu chak taka bawhzui turin a hriattir a. Hetah hian 100-bedded hospital sak mek Rs.60 crore a zawh tur anga ngaih te, guest house te, auditorium te, boys/girls hostels te sak mek ho te thildang hmalakna chi hrang hrang a awm avangin rang taka bawhzui a tul tih a sawi chu ngai pawimawhin theihtawp chhuaha tan an lak tur thu HITES Ltd. Hotute hian an sawi a ni.

Vawiin chawhma khan Dr R. Lalthanglian hian Union MSME Secretary Pu BB Swain-a chu office ah hmu in, MSME in guideline thar – North Eastern Region Guideline leh CDT Guideline an lo siam, a hmaa amah ngeiin a zuk thlen tawh thin chu an peih fel deuh thawkhat tawh tih thu Pu BB Swain hian a lo hrilh a, he inkaihhruaina thar hian Mizoram a MSME hnuaia hmalakna tur chi hrang hrang awlsam leh awmze nei deuh a kalpui dan tur a keng dawn a, hemi chungchangah hian a hmaa an lo indawr tawhna te leh an indawr chhoh zel dan tur te an sawi dun a ni. Food processing lama Mizoram hmasawnna tur thil chi hrang hrang te pawh Minister hian MSME Secretary hnenah hian a thlen bawk.

MSME Secretary a hmuh zawh hian Dr Thangtea chuan Union Secretary for Textiles Pu Upendra Prasad Singh chu a office ah hmu lehin, Bangladesh leh Mizoram insumdawn tawnna tur atana hmanni a Bangladesh Minister hnena amah ngeiin a lo thlen tawh handlooms leh textiles lama Mizoram tan kawng hrang hranga lian tham deuh hleka hmalakna tur project kan neih thu Minister hian a thlen a. Union Secretary hian a lo ngai pawhmawh hle in, rang taka lo enzui pui a in tiam a ni.

Hemi zawh hian Dr.Thangtea chuan Ministry of Textiles hnuaia Development Commissioner for Handloom Pu Sanjay Rastogi te, Pu Santosh Kumar Singh, Addl. Development Commissioner te, Pi Rita Prem Hemrajani, Managing Director, National Handloom Development Corporation Ltd., Govt. of India te leh Handloom lama an hotu pawimawh dang te nena inkawm hona tha tak a neih pui leh a, hetah hian Dr.Thangtea chuan ram pawn, a bik takin Bangladesh nen kan insumdawn tawnna tur atana kan lo inhmakhuana leh inbuatsaihna lailawk tur a nih avangin Mizoram District tinah Handloom Cluster a tam thei ang ber siam turin leh training pekna tur atan ruahmanna tha tak siam turin a ngen a, heng bakah hian handloom unit thar tam tak siam belh a pawimawh tih sawiin Minister hian heng atan hian a rang thei ang berin project an thehluh tur thu Central handloom hotute hi a hrilh a, anni pawhin tha taka lo dawngsawngin theihtawp lo chhuah pui zel an tum thu an a ni.

Vawiin vek khan Dr.Thangtea hian Union Health Secretary Dr. Rajesh Bhushan a office ah hmu lehin, Mizorama Health department hmalakna chi hrang hrangte sawipui a. National Health Mission hnuaia hmalakna chi hrang hrangte sawipuiin financial year tawp dawnah pawh Mizoramin pawisa duhthusama kan hmuh theih tak loh avangin harsatna tawk thei dinhmunah kan awm a ni a ti a, Union Health Secretary chuan supplementary budget atangin additional allocation rawn dil leh turin Minister hi thurawn a lo pe a, hei hi theihtawp chhuaha tihhlawhtlinpui a tum thu a lo hrilh.

Zoram Medical College (ZMC) tihhmasawnna (upgradation) tur chi hrang hrang atan Minister hian thil tamtak kan la mamawh thu a sawi a, heta tan hian DPR felfai buatsaih a, rang taka Health Ministry a thehlut turin Dr Bhushan hian thu a lo rawn a, a lo ngaih pawimawh sak hle a ni.

RIPANS Zemabawk chungchangah a bik takin Post Graduate class 7 (pasarih) dinna tur atana kum 2020 kum tir a sanction awm vek tawh cheng vaibelchhe 480 hi rang taka a chhuah theihnan hmalak sak turin a thlen a, chubakah chuan an hnathawktute non-teaching leh teaching faculty ten an superannuation chungchanga harsatna an neih te pawh a thlen bawk a, Union Health Secretary chuan hemi chungchang hi Cabinet meeting hmasa berah agenda atan put luh a tum thu a hrilh a ni. Hemi an meeting na ah hian Pi Vandana Jain, Jt.Secretary (i/c RIPANS) pawh in a tel pui a ni.

Dr R. Lalthangliana’n sawrkar laipui a dawrnaah hian Pu Alexander V Chongthu, MCS, Addl.Resident Commissioner, Mizoram House, New Delhi leh Pu Ronald Lalchhuanawma, Asst.Director, Commerce & Industries, Govt. of Mizoram ten an tawiawm a ni.