2376/2022-2023
Aizawl, 19th October, 2022 : Mizoram sawrkar leh Confederation of Indian Industry (CII) te buatsaih ni hnih awh tur State Level MSME Summit chu Commerce & Industruies Minister Dr R. Lalthangliana’n vawiin khan Millenium Centre chung zawlah a hawng.

Summit hawnna inkhawm buatsaihah Dr R. Lalthangliana chuan Mizoramah chuan industry lian pui pui aiin a te deuh zawk, bul tanna tura sum tam tak sen ngai lo chi Micro, Small and Medium Enterprises (MSMEs) tan than lenna leh hmasawnna kawng a inhawng zau tih sawiin hei hi fimkhur taka kan ngaihtuah a, hma kan lak tlan a ngai a, hemi atan hian bank leh financial institution dangte tel lovin hma lak a har a, bul tan turin kan tan tlan a kan thawhho a ngai a ni a ti a. Mizorama entrepreneur kan neihte, bul tan duhte dinhmun hrethiam a, loan an dil hunah pawh tha taka lo dawngsawng turin bank leh financial institution aiawha lo kalte a ngen a, hetih rual hian hun kal tawh a kan tawnhriatah bank loan latuten an rulh that loh avanga an dahkham chante an tam a, heng hian midangte tan kawng an dang ping zel tih hriat a tul a, ruahmanna tha leh felfai tak nen MSME hnuaia scheme hrang hrang chhawr tangkai duh ten loan pe theitute an dawr a pawimawh ve bawk a ni, a ti.

Khuallian chuan MSME hnuaiah scheme thar tha tak a lo chhuak a, a inkaihhruaina (guidelines) pawh India hmarchhak mil tura siam tura kan lo nawr tawh angin an rawn duang a, he scheme thar hnuaiah hian a tui mite tan tih theih thil tha tak tak a awm a, MSME website msme.gov.in/ ah lutin a zirchian theih reng a, entrepreneur ten an tih theih tur lo zirchiang sela, theihtawp chhuah an tum a nih phawt chuan sawrkar ang leh Minister a nih ang pawha tanpui a inhuam thu a sawi a ni.

Summit hawnna inkhawm hi Dr Lalrintluanga Jahau, (Member, CII & Director, Trinity Hospital) chuan a kaihruai a, Dr Lalrinchhana, Principal Adviser cum Addl secretary, Planning & Programme Implementation Department chuan keynotev address pe in, Pu P. Shimrah (O-i-C, RBI) , Pu KVSSLA Prasada Rao (General Manager, NABARD), Pu Mukesh ravi (Regional Manager, RBI), Pu V. Jayachandra (Chairman, MRB) leh Pu Lalnunpuia (Director, Zonet Cable Pvt. Ltd.) ten thu an sawi a ni.

State Level MSME Summit (Town Hall Meeting on MSME Financing cum Awareness Programme) hi ni hnih (19 & 20 October, 2022) neih tur a ni a. Vawiin chawhma khan Knowledge Session hman niin hetah hian MSME kaihnawih scheme hrang hrangte, Udhyam Registration/NLM/SCLCSS/SuandUpIndia/MUDRA/GGTMSE chungchang inhrilhfiah niin Pi Agnes Sailo (CII), Pu Diptesh Saha (Manager, RBI), Pu Mukul P Ekka (Branch Manager, SIDBI), Pu Diwakar (OIC, MSME-DFO, GOI) ten hun an hmang a ni.

Chawhnu lamah Loan Mela neih niin hetah hian NEDFi, MRB, MCAB, SBI, Axis Bank, Punjab National Bank, SIDBI, UBI, Federal Bank, HDFCI, Akash & Associates leh Jewel & Co. ten stall siamin entrepreneurs te nen an indawr a ni.

He summit hi naktuk nilenga neih chhunzawm tur a ni a, Bankers-Entrpreneurs Meet leh Knowledge Session te hman a ni ang.