Health & Family Welfare Minister chuan vawiin khan cheng nuaih 6,767 seng a sial Thanlawn-Singhat (Ngopa-Tuivai) road a hawng.

Minister hian Ngopa kawtchhuahah ribbon chep chatin kawngpui thar hawn chhinchhiahna lungphun a hawng a. Hemi hnu hian kawng thar hawn inkhawm Ngopa Jubilee Hall-ah neih chhunzawm a ni.

Thanlawn-Singhat (Ngopa-Tuivai) road hi kilometre 41.50 a thui niin NEC 11th Plan Scheme, Ministry of DoNER, Government of India hnuai ami a ni a. Intermediate Lane National Highway Standard Road niin kawngpui zau zawng hi metre 7.50 niin black-top chin hi metre 5.50 a zau a ni. Thanlawn-Singhat (Ngopa-Tuivai) road ah hian Culvert 174 siam a ni a, retaining wall siam zawng zawng thui zawng hi metre 1679.55 niin Kutcha Side Drain kilometer 36.158 a thui leh Pucca Side Drain kilometer 5.049 a thui siam a ni. Kawng sira chhinchhiahna (road signages) 160 leh Parapet 400 siam niin Crash Barrier meter 156 a thui siam ani bawk. Kawng laih hi June, 2011 khan contractor 28 hnenah work order pe a thawh tan a ni a. Culvert leh Retaining Wall te hi March, 2013 ah contractor 4 hnenah work order pe in thawh a ni bawk. Kawng laih, Culvert leh Retaining Wall te thawh zawh a nih hnu ah July ni 1, 2013 khan pavement hna hi Tantia Construction Pvt. Ltd, Kolkata hnenah pek a ni leh a, a kawng hna pumpui hi June ni 2, 2018 khan thawh zawh a ni. Thanlawn-Singhat (Ngopa-Tuivai) road hi Government of India in National Highway thar a puan “Keifang- Saichal-N.E. Bualpui-Tuivai Road’ NH-102 ‘B’ Guam chhungah a awm avangin Minister in a dawn hnu hian Chief Engineer, PWD, Highway kutah hlan a ni ang.

Thanlawn-Singhat (Ngopa-Tuivai) road hawn inkhawm Jubilee Hall, Ngopa a neihah khuallian Dr. R. Lalthangliana chuan Ngopa leh a chhehvel khua te a lawmpui thu sawiin sawrkarin kawngpui tha a ngaipawimawh a, Chief Minister pawhin a ngaih pawimawh ber pakhat anih avangin kawngpui tha siam turin pawisa hmuh theih ang ang an dap zel dawn a ni a ti a, Thanlawn-Singhat (Ngopa-Tuivai) road chu India hmarchhak leh South East Asia ramte inkalpawhna tangkai tak a ni dawn a ni a ti. Saitual-Saichal inkar kawng pawh District headquarters thar kalpawhna kawng hnai leh remchang ber anih avangin kawng hlun tha deuh a siam a pawimawh hle a ni a ti a. Black-top anih thuai theih nan ngaihtuahna sen a tul thu a sawi. Sawrkar angin ke an pen tan mek a, thil thar zirtur tam tak a awm a, hun hmasa lama tihsual leh tihfuhloh an neih te pawh an pawm thlap a, tihsual nawn an tum tawh lo tih sawiin mipuiten sawrkar hmalakna dikna leh rinawmna nena thlawp turin a sawm a. SEDP pawh a taka kalpui thuai turin chak taka hma lak mek a ni a ti a. Ngopa tlangdung khua te chu District thar a telh an nih chungchangah sawrkar thu awih taka an awm avangin lawmthu a hrilh a ni.
   
Khualzahawm bialtu MLA, Human Resource Development Board Vice-Chairman Pu L.Thangmawia pawhin a bial chhunga kawng thar tha tak hawn a ni ta chu lawmawm a tih thu a sawi a, PWD Minister Pu Zoramthanga bakah PWD a thawktute zawng zawng chungah lawmthu a sawi a. Mipuite chu kawng thar enkawl tha turin a chah a ni.

Thanlawn-Singhat (Ngopa-Tuivai) road hawn inkhawm hi Pu H.L Rochungnunga, Commissioner & Secretary, PWD in a kaihruai a, Minister tawiawmtu MLA pahnih Pu Lalrintluanga Sailo, Deputy Govt. Chief Whip leh Er. H.Lalzirliana, Vice-Chairman, Road & Infrastructure Development Board ten thu an sawi a, Er.Vanlalchhuana, SE, Eastern Circle, PWD in technical report pe in Er. R. Lalrintluanga, CE, Roads, PWD in lawmthu sawina hun hmangin hnu a khar a. Kawng thar hawn inkhawm ah hian Ngopa leh a chhehvel khaw mipui thahnem tak an kalkhawm a ni.