2910/2022-2023

Aizawl 1st Decmber 2022: Vawiin khan Dawrpui Multipurpose Hall, Aizawl-ah Health Minister Dr. R Lalthangliana chu Khuallian niin World AIDS Day leh Zoram Harh Rawh Campaign kharna hun a hmanpui a, Zoram Harh Rawh Campaign puala Central YMA leh MSACS buatsaih intihsiaknaa tithate lawmman a hlan nghal.

Health Minister Dr. R Lalthangliana chuan vawiin World Aids Day leh Zoram Harh Rawh Campaign tluang taka zawh theih a nih chu lawmawm a tih thu a sawi a. Khawvel leh Mizoramin a buaipui em em HIV/AIDS dona kawngah MSACS leh YMA te thawhona chu fakawm tiin he campaign hian rah tha a chhuah ngei a rin thu a sawi a ni. Thalai mai ni lo, nu leh pa suattu chu HIV AIDS hi a ni a; a dona kawngah Mizo mipui leh NGO te tanrual a pawimawh thu sawiin mimal tana hamthatna leh inhaivurna lam ngaituah miah lovin, a mamawhte tana luanchhuah hi a tul takzet a ni a ti. Khawvel damchhunga pawimawh ber chu hriselna a ni tiin hrisel lo tan chuan hmasawnnain awmzia a neih loh thu a sawi. Mizoram chu state ralmuang leh mipui pawh hlim thei tak a nih laiin AIDS vei tam lamah a lang reng chu pawi a tih thu sawiin vawiin programme-a kalkhawmte chu mitin mawhphurhnaah ngaiin Zofate chhanna tur a nih hriain AIDS dona kawngah tangho zel turin a fuih bawk. CYMA leh MSACS te tawngkawp intihsiakna hi chhan tha tak neia buatsaih a nih ang takin hmalak zel dan turah pawh an ngaihtuahna seng theuh turin kalkhawmte a chah a ni.

Vawiin kharna inkhawm hi Pu Lalhmachhuana, Vice President CYMA in a kaihruai a, Pu R. Lalngheta, President CYMA in thuhma sawiin Prof. Lalnuntluanga, Gen.Secy. CYMA hnen atangin report ngaihthlak a ni. MSACS staff leh thawhpui thawk thate hnenah lawmpuina thuziak hlan niin, Mizo zai leh lama Mizoram pum huap intihsiakna-a titha te lawmman pek nghal an ni. Zoram Harh Rawh tih campaign puala neih State Level Competition-ah hian District 9-atangin YMA Branch te chuan Khuallam, Cheraw leh Pipu zai hmangin an intihsiakna an nei a. Heta Lawmman dawngtu te chu:
1) Vaivakawn Branch YMA, Aizawl
2) Chanmari Branch YMA, Lunglei
3) Reiek Branch YMA, Mamit te an ni. 

Attachment

  • Loading attachment...