Vawiin khan Health & Family Welfare Minister Dr. R.Lalthangliana kaihhruaiin Assembly Annexe Conference Hall-ah Sensitization on HIV/AIDS for Christian Youth Leaders neih a ni.

Health & Family Welfare Minister Dr. R.Lalthangliana chuan Kohhran hrang hranga lawi te'n mahni zawn teuhah HIV/AIDS dona kawnga tan la thar ila, chhungkaw tin ten tawngtainaah hlan turin Zoram mipuite a ngen a. Minister chuan ngawirenga nunna la tu hi tun atanga do a nih loh chuan hnamin a la tuar ang, tiin a sawi a. Minister Dr. R.Lalthangliana chuan Pathian rawngbawlna a ni tih hre reng turin leh sawihona hun an siam te pawh tangkai taka hmang turin kalkhawmte duhsakna a hlan a ni.

Mizoram State Aids Control Society (MSACS) Project Director Dr. Lalthlengliani chuan HIV/AIDS and Christian Youths zir bikna paper a present chu zir ho a ni a. Dr. Lalthlengliani chuan ram pum a hniam zawnga a kal laiin, Mizoram state in HIV/AIDS status a sang zawnga nei chu chona nasa tak a ni a, sawrkar, mipui, kohhran te leh NGO hrang hrang te, hnam tan leh ram tan tanrual a ngai tak zet a ni, a ti a. Kum 2019-20 (September thleng) chhunga Nu naupai zingah HIV+ nei district hrang hrangah hmuhchhuah zel a ni a, Aizawl District ah a tam zual a ni, a ti a. Dr. Lalthlengliani chuan Kohhran Thalaiten HIV laka invennan tih theih hrang hrang an nei a, HIV laka inven dan tur nungchang a thalaipuiah a zirtir thei a, HIV laka fihlim turin mahni kovah ngei mawhphurhna a inbel tih te, HIV+ te hmuhsit leh endawng mai lovin, hmangaihna leh lainatna nen a chhawmdawl te leh tleirawl/rawltharte tan hunawl an hman tangkai theihna tur hmun leh hun te an siamsak thei a ni, a ti a.

He hunah hian sawiho tur topic hrang hrang chhawpchhuah a ni a, chungte chu:

1. Kohhran thalai thiltih thin tamtak hi zan lamah a ni thin a, hei hian nghawng thalo a nei thei ang em?

2. Naupang/tleirawl inkhawmah hian tunlai nun harsatna hrang hrang hmachhawn thiam theih dan tur inzirtirna hi uar leh zualin a kalpui theih ang em?

3. Nupui pasal neih dawnin, innei turte hi an HIV dinhmun inhriatsak tawn ngei tura thisen test hi a hun tawh lo maw?

4. Nula Tlangval zingah invenna tellova mipat hmeichhiatna lo hmang tawh thin leh vawi khat tal ruihhlo lo inchiu a, midang hriau lo hman tawmpui tawhte chuan HIV dinhmun hre tura thisen test hi tih nak mawh a nih thu Kohhran thalai ah sawi tam hi a tha ang em?

He hunah hian kohhran hrang hrang 9 atangin hruaitu mi 50 vel leh midangte an tel a ni.

Attachment

  • Loading attachment...