Nimin 8th December 2019 (Chawlhni) Dar 2:00 pm MZP Headquarters, Lunglei Emergency Meeting chuan Central Sawrkar-in Citizenship Amendment Bill (CAB) Lok Sabha leh Rajya Sabha put luh a tum chungchangah North East Students’ Organisation (NESO) meeting in 10th December 2019 (Thawhlehni)-a North East pumpuia “North East Shutdown” a neih tur chu MZP Headquarters, Lunglei pawhin thlawp ve ngei nise tha a ti a. Hemi ni hian Lunglei khawpui chhungah Total Bandh neih nise tiin MZP Headquarters, Lunglei meeting chuan a rel a ni.

He Total Bandh huaihawt tur chungchang sawiho turin vawiin khan Lunglei DC Office chamber-ah meeting neih a ni a. Meeting-ah hian Lunglei Additional DC-te Pu David Liansanglura Pachuau leh Pu R. Vanrengpuia, Lunglei Additional SP Pu Lalchhuanthanga leh a kaihhnawih official-te bakah MZP Headquarters, Lunglei atangin K.Lalremruata, Vice President leh Lalpeksanga Chenkual, Secretary-te an tel a ni.

Meeting kaihruaitu Lunglei Additional DC Pu David Liansanglura Pachuau chuan boruak muanawm leh ralmuang tak hnuaia Total Bandh kalpui anih theih nan MZP Headquarters, Lunglei hruaitute chu thawhho puiah a sawm a. Total bandh in a huam loh chin, Zirlai Exam nei mekte, Medical Duty-te, On Duty PWD, PHE leh P&E, Media, Chanchinbu sem, bawnghnute sem leh Magistrate-te leh Bandh kaihhnawih police duty-ten an tih tur leh an mawhphurna theuh tluang taka an hlen chhuah theih nan MZP hruaitute chu hmalak pui turin an chah nawn bawk.

MZP Headquarters, Lunglei hruaitute pawhin Total Bandh chu boruak ralmuang tak hnuaia huaihawt an duh thu sawiin hemi tur hian theihtawpin hma an lak mek thu an tarlang a. Lunglei khawpui chhung hmun pariat (8) – Hrangchalkawn, 3 Gate, Ramthar AOC, Civil Hospital Chanmari, Venglai, Rahsiveng, Bazar Veng SBI bulah leh Zotlang ah te Duty point siam tum anih thu an tarlang a. Thil thleng duhawm lo leh boruak tha lo a awmloh na turin inhriatthiam tawnna boruak tha hnuaia Police leh magistrate-te nen hmalak an duh thu an tarlang a. Tum lawk dan chuan total Bandh hi naktuk 10^th December, 2019 (thawhlehni) zing Dar 6 atanga tlai lam Dar 4 thleng neih a ni dawn tih an tarlang bawk.