Department of Chemistry leh Department of Geology, Pachhunga University College te buatsaih Winter School 2019 chu December ni 9, 2019 hian PUC Seminar Hall ah hman tan a ni. He programme hi B. Sc. Zirlaite pual niin kar khat chhung a awh dawn a. Dr Vanlaltanpuia, Chairman, Mizoram Youth Commission chu kuallian niin, Dr Tawnenga, Principal, PUC chu khualzahawm a ni a, Dr Lalthazuala Rokhum, Cambridge University, United Kingdom a Post Doctoral ti mek chuan keynote address a pe bawk.

Khuallian Dr Vanlaltanpuia chuan thu sawiin, central service lama lut thei tura kan zirna kalphung leh kalhmang siamthat a ngaih thu leh, MYC anga theih tawpa hmalak thar a nih tur thu a sawi a. Delhi tlanga miten min hmuh dan sawiin, Mizote hian Delhi lamte an el phak tawh loh thu sawiin tan lak a ngaih thu a sawi a. Zirlaite hmasawnna atana hetiang ang programme buatsaih a ni hi lawmawm a tih thu sawiin duhsakna a hlan a ni.

Khualzahawm Dr Tawnenga pawhin thu sawiin, PUC-ah PG course pathum kallai mek bakah, pahnih dang, M. Sc. Geophysics leh M.Sc. Statistics zirna thar a awm dawn thu a sawi a. Geophysics hi Physics leh Geology department ten an enkawl ang a, Statistics hi Mathematics leh Statistics department ten an enkawl dawn a ni.

Zirlaite fuihin, hlawhtlinna tluantling a awm theih nana bul tan fuh a ngaih thu te, chhawr tlak azirna kalpui a ngaihthu te a sawi bawk a ni. Keynote address petu, NIT Silchar-a Chemstry department-a a thawk Dr Lalthazuala Rokhum hian post doctoral a tihna Cambridge University chanchin sawiin, an University in kum khat chhunga a thawhchhuah chu Mizoram budget let a nih thu a tarlang a. Nitin nuna hman tangkai theihah research an beih nasat thu a sawi a. Balhla pil, thei hawng leh hnawm thil dang hmanga fuel siam chhuah theih a nih thu leh, an siam dan tlangpui a sawi bawk.

He programme Co-ordinator Dr K. Vanlaldinpuia chuan DBT Star College Scheme hmanga project chi hrang hrang an kalpui thu leh hmasawnna awm te a tarlang bawk.

He Winter School hi DBT Star College Scheme bultuma neih niin, MEDMOC leh Mizoram Rural Bank te sponsor a ni a. Subject chi hrang hrang entrepreneurship te, career awareness te, research methodology te, disaster management te, banking sector leh life skill development lamah te mithiam, ram chhung leh pawn atanga kalkhawmten zirtirna an pe dawn a ni.