Health & Family Welfare Minister Dr. R. Lalthangliana chuan Inrinni a RIMS Board of Governors meeting Imphal-a neih tak a tel hnuin heng a hnuaia Guwahati a Mizoram sawrkar empanelled Hospital pasarih nimin khan a tlawh a, chungte chu- Excel Care Hospital, Shri Sankaradeva Nethralaya (SSN), Apollo International Hospital, Downtown Hospital, GNRC Hospital, Dr B.Baruah Cancer Institute (BBCI), Pratiksha Hospital te an ni.
 
Hospital  pasarih a tlawh naah hian an hotu pawimawh tak tak ten lo dawngsawngin inkawmna hun tha tak an nei a. Minister Dr. R.Lalthangliana hian natna bik nei te enkawlna atana an thiamna bik (speciality) an neih te zawtin Cardiology, Neurology leh Cancer enkawlna lam a thiamna bik te chu a tangkai tur thu a sawi a. Heng hospital ah hian Mizoram atangin mi rethei zawkte leh sum leh pai mai bakah tawng thiam loh avanga mahni natna pawh sawi thiam lo te, kalpuitu tha pawh nei lo ten inenkawl turin an pan thin a. Dam lo te hi hriatthiamna thui tak nen lo enkawl a, Mizoram nen hun rei tak an lo thawhhona te avanga duhsak taka ngaihhnathiamna lo nei turin Minister hian a ngen a ni.

October ni 1-a Mizoram Healthcare  scheme thar hman tur pawh sawi langin Minister chuan tha taka lo dawngsawng a, theihtawp chhuaha lo thawhpui zel turin a ngen a. Gold Card neiten damdawiin thenkhata an harsatna tawh te pawh sawiin a chin fel dan kawng dap pui turin a chah bawk. Minister chuan Damdawi lama thiamna lamah Mizoram ala pachhiat deuh avangin department thenkhat, pawimawh bik mamawh tak tak, Mizoram in a la neih si loh te a awm a. Hei vang hian heng hospital liana kan doctor-ten short course/training an neih theihdan turte pawh a sawipui a ni.

Heng bakah hian Minister chuan Guwahati leh Aizawl direct flight a awm dawn avangin rampawn lama hmunpui pan ve thei lote tan inentirna chhawp hnaihsak turin thiamna bik nei doctor -te ni hnih khat chama Mizoram alo kal turin a ngen a ni.

Health & Family Welfare Minister chuan hospital a hotute chu dam lo harsatna  tawk emaw thihna tawk te, an mahnia sut tlang theih loh thil te a lo awm thin a. Chutiang thila awlsam zawk a an buaipui theihnan Mizoram House thuneitu leh staff te chu sawrkar aiawh an nih avangin Special Entry card lo siamsak a lo issue turin a hrilh bawk a ni.

Guwahati-a empanelled hospital tlawhnaah hian hian Pu Donny Lalruatsanga, Guwahati DRC; Pu Vanlaltlana Zote, PS leh Mizoram house a thawktuten an tawiawm a ni.

Inrinni a RIMS meetinga a tel pah hian Imphal a Mizo Zirlai Pawl, All Mizo Medical Students Union te nen inkawmna hun an nei a, anni hian an duh leh mamawh te thlenin Minister hian Rs.10000 a pe a ni. Guwahati Mizo Welfare Association leh Guwahati Mizo Students Union te  Rs 10000 ve  ve a tul ang an hman atan a pe bawk a ni.