Vawiin khan Power & Electricity Department minister Pu R. Lalzirliana’n  Internet leh mobile phone hmang a electric bill pek dan awlsam Bharat Bill Payment System (BBPS) leh Mobile Point of Sales (MPOS) chu mipuite hman turin Aijal Club ah a hawng.

BBPS kaltlang hian electric bill te hi pek theihna chi hrang hrang a awm dawn a.  powermizoram.gov.in portal ah lut in a pek theih dawn a, Mobile App hrang hrang BHTM UPI, Paytm, Phonepe, GPay leh channel dang BBPS nena thlunzawm Bank leh Non Banking institution –Billdesk, PayU leh khua/veng hrang hrang a  Common Service Centre te hmangin a pek theih vek tawh dawn a, tunhma a convenience fee lak thin kha a bo tawh dawn bawk a ni. Bharat Bill Payment System hi India ram puma hman turin RBI chuan August ni 7, 2014 khan 'Draft Guidelines for implementation of BBPS' a tichhuak a, mipuite ngaihdan lakfel a nih hnuah siam rem ngai te siam tha in hman nghal a ni. RBI hian Bharat Bill Payment Central Unit (BBPCU) atan National Payments Corporation of India (NPCI) a ruat a, anni hnuaia transactions ti thei tur hian hian Bharat Bill Payment Operating Unit (BBPOU) 73, Bank leh Non-Bank institutions te ruat an ni a. Non- Bank institutions zingah Mizorama hman theih chu Billdesk, PayU leh Common Service Centre te hi an ni. Tun dinhmunah hian BBPS kaltlang a bill pe thei RBI in a approved te chu Electric bill, Tui bill, Telephone/Mobile phone bill, Gas bill leh DishTv Direct To Home (DTH) bill te hi an ni.

Mobile Point of Sales hi swipe machine kan tih ang kha a ni a, credit card emaw Debit card hmang a electric bill pekna tur a siam a ni a. A khawl hi Ezetap leh HDFC Bank ten mipui rawngbawlna a ngaiin an tum vek a ni. MPOS hian BBPS a kaltlang lo chungin convenience fee pawh chawi ngailo turin ruahmanna siam a ni.

Khuallian Pu R. Lalzirliana chuan mipuite harsatna chhawk zangkhai tura ruahmanna thar kalpui theih a ni ta chu lawmawm a tih thu sawiin tunah chuan electric bill pe duh ten department counter pan kher a ngai tawh dawn lova, nileng a thui tak tak bill pe tura intlar thin pawh a ziaawm phah dawn a ni a ti a. Consumer te tan payment channel an hman azirin yhamthatna chi hrang hrang a awm thei dawn a, bill kan pek dan te, electric kan hman dan reciord te pawh a hriat theih vek tawh dawn a ni a ti. Minister chuan smart meter hmang tura inpuahchah mek a nih thu sawiin kan tihhlawhtlin hunah chuan meter reading diklo vanga mipuite harsatna tawh thin pawh a kiam ngei a beisei thu a sawi a. Power & Electricity department bakah BBPS mithiamte, HDFC bank leh Ezetap a thawkte inpekna leh thahnemngaihnaah lawmthu a sawi bawk a ni.

He hun hi Dr. Lalzirmawia Chhangte, P&E Secretary in a kaihruai a. Pu C.Lianlunga, E-in-C, P&E department in technical report pe in BBPS, HDFC leh Ezetap aiawh ten thu an sawi a, BBPS leh MPOS hman dan inzirtirna hun hman a ni bawk.