Nimin ni 17 December, 2019 (Thawhlehni) khan Health & Family Welfare, Higher & Technical Education leh Commerce & Industry Minister Dr.R.Lalthangliana chuan Union Secretary for Tribal Affairs Pu Deepak Khandekar hmuin Mizoram mamawh thil hrang hrang te a sawipui a.

Minister Dr.R.Lalthangliana chuan Zoram Medical College-a Boys & Girls Hostel sakna tur proposal a hmaa a lo thehluh leh sawi pui tawh chungchang a sawi pui leh a. Damdawiin PHC leh Sub-Centre upgrade-na tur sum an rawn ruahman thin chu a beitham deuh avangin tam tham deuh leh awmze nei deuh tura tipung turin Union Secretary Pu Deepak Khandekar hnenah chuan thlen a. Mizoram in Health & Wellness Centre atana sum tlem te te a hmuh thin te pawh rawn tipung turin Health & Family Welfare Minister Dr R.Lalthangliana chuan ngen bawk a ni.

Mizoram hmun hrang hrangah Health Clinic 147 awm mekah, hmun thenkhatah mimal in luah chawp a ni a, NGO te nen a sak hna te thawkhova kalpui mek a ni a. Minister chuan heng atana sum mamawh te phuhruk sak turin Union Secretary hian a thlen a, Union Secretary Pu Deepak Khandekar chuan ruahmanna rawn siam nghal turin a lo ti a, ngaihtuah nghal a nih tur thu Minister hi a lo hrilh a ni.

Minister Dr. R.Lalthangliana hian sawrkar college hrang hrang a hostel mamawh sakna turte, multipurpose hall sakna tur atan ruahmanna neih sak turin a thlen bawk a. Union Secretary hian hma lo lakpui a intiam bakah ruahmanna thehlut turin Minister hi thu a lo rawn nghal bawk a ni.

Nimin vek hian Union Secretary for Ayush Pu Vaidya Rajesh Kotecha leh Ayush Ministry a official pawimawh tak tak te kawm nghalin, Mizoram a Ayush Hospital dinna tur atana proposal lo thehluh tawh chungchang sawipui a. Ayush Doctor engngemaw zat pe tura ngenna lo thlen tawh chungchang te, medicinal plants leh thil dang dang a hmalakna Minister in a lo thehluh tawh chungchangte an sawi a; Ministry lam pawh an in hawngin sawrkar kumtharah theihtawp chhuah pui an lo intiam a ni.

Dr.R.Lalthangliana hian Union Secretary for Micro, Small & Medium Enterprises Dr.Arun Kumar Panda pawh hmuin Mizoram a District pasarih a thalai lehkhathiam leh thiamna bik nei te tan Common Facility Centre din theihdan tur kawng a sawipui a. He Centre hi thalai lehkhathiam leh thiamna bik nei tan eizawnna kawng kawhhmuhtu tangkai tak a ni thei dawn a; he thil hi sawrkar flagship programme SEDP a ngaih pawimawh tak a ni dawn bawk a ni. Heng bakah hian MSME hnuaiah chhungkua leh mimal tana eizawnna ngel nghet neih theihna tur scheme chi hrang hrang an neih theih te, Mizoram tana theihtawp chhuaha ngaihtuahna sen puia hma lak pui turin a sawm a, hemi chungchangah hian Union Secretary pawh a lo inhawng hle a ni. Kum thar January thla tawp lam hian Mizoram ah a hmun ngeia lo kal a official te nen thil tihdan tur kawng sawiho a duh thu Minister hi a lo hrilh bawk a ni.

Hemi ni vek hian Health Minister hi Union Secretary for DoNER Dr.Inderjit Singh nen inhmuin Ministry Official dang pawimawh te pawh an tel a, Health & Family Welfare leh Higher &Technical Education Department atanga Ministry a ruahmanna siam Mizoram sawrkarin a thehluh tawh hrang hrang te sawihona Dr.R.Lalthangliana hian a neih pui bawk a ni.

Minister hi Pu Ajay Chaudhury, Resident Commissioner, Mizoram House, New Delhi in a tawiawm a ni.