2391/2025-2026

Champhai, dated 26th November 2025: Education Minister Dr. Vanlalthlana chuan vawiin khan Govt. Champhai High School Golden Jubilee (kum 50 tlin) lawmna chu khuallian niin a hmanpui.

Khuallian Dr. Vanlalthlana chuan thu sawiin Govt. Champhai High School chu school lar tak, zirna leh infiamnaah hlawhtlinna pawh lo nei hnem tawh an ni a, Golden Jubilee an thleng thei hi ropui a tih thu a sawi a, nakin zela hlawhtlinna chang chhunzawm turin zirlai leh zirtirtu te theihtawp chhuah turin a chah. Mihring chuan thil tum kan nei theuh a, Champhai tan leh mahni sikul tan thil tha duh chuan mahni theuh an pawimawh tih a sawi. Sikul motto "Labour First, Pleasure Next" tih chu a tha hle tih sawiin nakina eizawnna leh chhungkaw chawmna nei turin he motto hi lo vuan nghet tlat turin zirlaite a chah a. Zirna hi chakna a ni a, Mizoram chuan human resources a nei tha hle a ni tih a sawi a, chung siamtu chu zirtirtute an nih tih sawiin zirtirtute kawng hrang hranga naupang kaihruai thiam tur leh mahni inthlak thiama naupang hrang hrang enkawl tura inzir turin a chah a. Jubilee lawmna hlim taka lawm tur leh kum dang tam tak ding zel turin duhsakna a hlan a ni.

He hunah hian Headmaster Pi Lalhlimthangi Khiangte chu chairman niin khuallian leh kalkhawm te lawmna thu a sawi a, Teacher Pu Vanlalchhana Hmar chuan report tawi, Golden Jubilee rel dan te a sawi. Director of School Education Pi Angela Zothanpuii chuan Golden Jubilee Souvenir, Tlaizawng tih a tlangzarh a, thu tawi a sawi bawk. Zirlai lo ni thin tawh hrang hrangin thu an sawi a, zai leh intihhlimna hrang hrang a awm bawk a, Minister hovin tlaiah ruai theh nghal a ni.

Govt. Champhai High School Golden Jubilee lawmna hi naktukah chhunzawm a ni ang a, Champhai North bialtu MLA Er. H. Ginzalala khuallian a ni dawn a ni.