2383/2025-2026

Khawzawl, dated 25th September 2025: Education Minister Dr. Vanlalthlana'n vawiin khan Govt. Tualte Primary School kum 100 tlin lawmna (centenary) khuallian niin a hmanpui a, centenary lungphun a hawng bawk.

Khuallian Dr. Vanlalthlana chuan thu sawiin Tualte Primary School-in kum 100 an thleng thei hi ropui a tih thu a sawi a, zirtirtu ni mek te leh pension tawhte an fakawm thu sawiin zahna chibai a buk a. Tomato thar tam ber an nihna angin khaw taima an ni tih a hriat hle a ni tih a sawi a, ketchup siam nan te pawh an hmang tawh a, a ropui hle a ni tih sawiin lo taima chhunzawm zel turin a fuih bawk. Ramngaw humhalh kawngah pawh an tha hle a, khawvel hmasawn zelnaah ramngaw a pawimawh em em a, tha taka enkawlin ramngaw leh ramsa te humhalh zel turin a fuih bawk. Zirlaite chuan faina leh hriselna te ngai pawimawh turin a fuih a, bawlhhlawh an neih leh hmuh apiang bawlhhlawh bawmah paih zel turin a chah bawk. Tualte vanglai thleng leh thei turin zirna ngai pawimawh turin a chah a, Tualte Primary School leh Tualte khua vul zel turin duhsakna a hlan a ni.

He hun hi Tualte VCP Pu R. Lalchhanchhuaha'n a kaihruai a, Headmaster i/c Pu F. Laldampuia'n Govt. Tualte Primary School chungchang, hmalakna leh dinhmun te report tawi a pe. Khawzawl Bawrhsap Pu K. Vanlalthiana, Samagra Shiksha State Project Director Pu C. Lalthanzira leh Khawzawl District Education Officer Pu Lalrawngbawla te'n thu tawi an sawi bawk a ni.

He hunah hian Education Addl. Director Pu Zohmingthanga leh Khawzawl DEO office ami te'n Minister an tawiawm bawk a ni.