2382/2025-2026

Dated Aizawl, the 25th November, 2025: Vawiin chawhnu khan Pu Lalthansanga, Minister, Fisheries Department chuan sangha vawn thatna tur, Cold Storage For Fisheries hawnna hun chu Ngaizel, Kulikawnah khuallian niin a hmanpui a, Cold Storage chu a hawng nghal a ni.

Khuallian Pu Lalthansanga chuan Fisheries Department in SASCE hnuaia sangha vawn thatna tur Cold Storage a din thei chu lawmawm a tih thu leh Fisheries Department mai bakah sangha khawitu leh zuartute chu a lawmpui thu a sawi a. Sangha chu sa chhe hma tak mai, vawn that a nih loh chuan hralh tlak loha chhe mai thin a nih avangin Cold Storage chu sangha khawitu leh zuartute tana hmasawnna pawimawh tak leh tangkai tak a nih tur thu a sawi a. Minister chuan sangha khawi leh a kaihhnawih lama hmasawnna tura sawrkar hmalakna thenkhat a tarlang bawk a. District tina sangha khawituten (fish farmer) sangha an neih dan leh an thar zat zirchiana, sangha tam zawk leh lian zawk an thar theih nan Department chuan ruahmanna a siam thu leh Mizorama thar sangha tharlam zawk ngei mipuite eitir an tum thu a sawi a ni.

Vawiin Cold Storage hawnna inkhawm hi Aizawl South II bialtu MLA, Pu Lalchhuanthanga’n khualzahawm niin a hmanpui a, a bial chhunga Fisheries Department in sangha hralhna kawnga hmasawnna ruhrel tha tak an din chu lawmawm a tih thu a sawi a. Hawnna inkhawm hi Er. Lalrothanga, Secretary, Fisheries Department chuan a kaihruai a, Pi Laltleipuii, Director chuan Cold Storage din chhoh a nih dan report pein, Pi Zonuntluangi, Joint Director in lawmthu sawiin hun a khar a ni.

He Cold Storage hi Special Assistance to States for Capital Expenditure (SASCE) 2020-2021 chhunga Integrated Fishery and Agro-based Processing Unit component, Horticulture Department Nodal-na hnuaia din niin, he project atan hian Rs. 123 lakhs hmuh a ni a. He Cold storage ah hian cold chamber pahnih awmin, sangha 16 tonnes vel vawng tha thei tura ruahman a ni a. Tin, thianghlim leh felfai zawka sangha zawrh chhuah theihna tur he cold storage building ah hian siam niin, a chhawng hnuai leh kawng rual chung pawh tangkai taka hman theih turin sak nghal a ni bawk.