2381/2025-2026

Khawzawl, dated 25th November 2025: Education Minister Dr. Vanlalthlana'n vawiin khan Govt. Khawzawl College, Govt. Khawzawl Higher Secondary School leh District Education Office, Khawzawl a tlawh.

Minister chuan Govt. Khawzawl College-ah Principal Pi Lalruatmawii leh college zirtirtu hrang hrangte nen inkawmna hun a hmang a, Principal chuan Minister leh a zuitu hrang hrang te lo lawmin an college chungchang, an hlawhtlinna leh an hmasawnna te a sawi lang a, PM Vishwakarma hnuaia Training Centre an din thu te sawiin an mamawh leh an harsatna te an thlen nghal bawk.

Minister Dr. Vanlalthlana chuan Govt. Khawzawl College a tak ngeia a hmu thei chu lawmawm a tih thu a sawi a, an pass percentage sang tak leh hmalakna tha tak tak an neih vangin fakawm a tih thu a sawi. College zirlaite chu puitling an nih tawh thu sawiin mahnia inzir leh inhai kaw thei tura kaihhruai an ngaih thu a sawi a, mahnia ngaihtuahna senga kalkawng thlang thiam tura siam an tul thu a sawi. Higher & Technical Education hnuaia thil thar leh hma lak mek te a sawi bawk a, an mamawh leh harsatnaah te theihtawpa puih a tum thu a sawi.

Minister Dr. Vanlalthlana chuan Govt. Khawzawl Higher Secondary School a tlawh bawk a, zirlai leh zirtirtu te nen inkawmna hun a hmang bawk. Zirlaite tan rilru hriselna (mental health) pawimawh zia sawiin zirtirtu te'n zirlaite kaihruai thaa rilru lama damlohna (depression, anxiety etc.) an neih loh nana venghim tha turin a chah.

Hemi zawh hian District Education Office, Khawzawl tlawhin officer leh staff te nen inkawmna hun a hmang a, an mamawh te ngaithlain theih ang anga pui zel a tum thu a sawi bawk a ni.

He hunah hian Khawzawl Bawrhsap Pu K. Vanlalthiana, Education Addl. Director Pu Zohmingthanga, Samagra Shiksha State Project Director Pu C. Lalthanzira te'n Minister an tawiawm a ni.