39-Siaha (AC) Bialtu MLA leh Minister of State  Dr. K.Beichhua chuan  Covid-19 kaihhnawih thila a tulna apiang, a bial chhunga  hman turin  District Level Task Force, Chairman leh Bawrhsap ni bawk Pu Bhupesh Chaudhary,IAS hnenah a MLA Fund atangin Rs.10,00,000/- a hlan.

Minister Dr.K.Beichhua chuan COVID-19 vangin  Siaha District, a bikin a bial chhunga mipui te leh Sawrkar official ten harsatna an tawk em? tiin DLTF chairman atangin a ngaihven reng thin a ni. Lockdown puan hnua  Siaha district zirlai naupang  thahnem tak, state pawn atanga Aizawl lo lut te,  Aizawla zirlai naupang awm te leh damlo in entira Aizawl  a  tangkhang te zawng zawng pawh Aizawl Mara Welfare  leh Joint MSO te nen tanghovin an lo buaipui char  char tawh a ni. Minister Dr.K.Beichhua chuan Complete lockdown a ni tawh a, tih theih tlem  hle mahse,  Covid-19 avanga  harsatna tawk Zirlai naupang  te chuan amah chu inthlahrung lova hrilhhriat turin a chah hlawm bawk.

 Minister Dr.K.Beichhua chuan  a bial mipui leh Siaha district mipui te  chu ei leh bar-ah thlaphang loh tura chahin,  LALPA pathian khawngaihna zarah tumah chhuanchhamin kan awm lovang a ti.

 Minister chuan MLA Fund te chu a tul dan angin kan la hmang zel  ang lo thlaphang reng reng suh u; Sawrkarin theihtawp a chhuah mek reng e, a ti  bawk.

Minister chuan Covid-19 laka  Siaha District a him theih nan  theihtawp chhuaha hnathawktu  Medical staff te, Sawrkar official te,  DLTF/ VLTF te, Joint VC/VC te, Tlawmngai pawl te, Zirlai pawl leh Kohhran hrang hrang chungah lawmthu ka sawi tak zet a ni, a ti. Minister chuan mipui te pawhin Sawrkar  leh DLTF/VLTF in tihtur a ti leh tihloh tur a ti te chu tha taka zawm hram hram turin a ngen bawk.

Minister Dr.K.Beichhua chuan hun harsa leh khirkhanah chuan kei ni kristian tan chuan tawngtai hi kan thlamuanna ber a nih thin kha, haw u  intawngtaipui tawnin LALPA  pathian kutah in kawltir theuh ang u, tiin  Siaha district mipui  te a sawm bawk.