Tukin zing dar 8:00Am khan Dr. K.Beichhua, MoS i/c  SWD, AH&Vety, Seri. etc chuan Siaha-a Medical establishment a tlawh. Minister hi Dr.T.Lalhmangaihi, Director H&ME in a tawiawm a ni.

Dr.K.Beichhua hian District  Hospital, CMO office, Nursing College leh District Hospital New Building te a tlawh a ni.

Amah an lo chawnglawmna programme tawi, District Hospital building thara neihah hian Dr.C.Lalrosanga, DMS chuan report pe in,  tunah hian Medical dept hian staff 88 a nei mek a. Doctor-12, Staff nurse 22 (regular-8 leh Contract-14 ) an awm mek a ni. Surgeon,Opthalmologist,Orthopaedic leh Pathologist te an mamawh thu  tarlangin, an mamawh hrang hrang te pawh  Minister hnenah hian a thlen nghal bawk a ni.

He inkhawm tawiah hian thu sawiin Dr.K.Beichhua chuan Mizoram chauh ni lo, India ram state dangah te pawh hian *indaih* tih hi a awm thei loh a ni ber a.  Siaha Medical Dept  pawh indaih lo tak chungin in kal bek bek a ni, tih hre chiang ber tute zing a mi ka ni. Medical Dept-ah chauh ni lovin, Dept dangah pawh Siaha district hi kan hnufualin, kan indaih lo hlawm hle a.  Indaih lo chung pawh hian district dang te umpha-a  an ruala ke pen ve zel ka duh chuan  District dang aia kan taimak a, kan tumruh a, kan inpumpek lehzuala  a ngai a ni. Tu nge thawk taima ber, tu nge thawk tam ber tihin lo in el reng thin r’u, a ti.

Minister chuan tunah hian  Sawrkar thar chuan lo a vat tan mek chauh a ni a. Tih tur leh hmabak a la tam em em a ni. Kan Medical quarter kan indaih lo em avangin  Siaha-a  Medical quarters thar 6 sakna tur  tihfel tawh a ni a.

Mizoram Doctor leh Nurse indaih lohna phuruk turin Medical officers 31 leh Staff Nurses 15 lakna tur pawh MPSC a thawnfel  tawh niin, Medical Officer 227 lak belh leh na tur Proposal pawh tunah hian a kal mek  a ni.

District Hospital atan  ICU Stabilizer 2 leh Dialysis khawl 2 Social welfare Dept atangin proposal siam tawh  ni, a ti a.

Minister Dr.K.Beichhua leh Dr.T.Lalhmangaihi, Director H&ME te chuan uluk takin District Hospital Building thar hi an fanga,  Affluent Treatment  siam ngai te,  Room tam taka Floor Tile phah ngai te, Drain khuhna siam ngai te, Solar Power bun ngai te leh  Dedicated Transformer  bun ngai te mit ngeiin an hmu a, chak taka bawhzui an tum a ni.

Medical ram chhunga *One Stop Centre* (Kut emaw Hleihlenna hrang hrang tuar hmeichhia te tlukluh lailawkna  tur In) Social Welfare Dept atanga sak tur hmun hma te pawh  Minister leh Director te hian an thli-thlai nghal bawk a ni.