No.2667/2020-2020

Vawiin khan Commerce and Industries Minister Dr R.Lalthangliana hovin Industrial Development Board Vice Chairman Pu C.Ramhluna bakah Commerce and Industries Department hnuaia officer-te leh Board hrang hrang hotuten SAD Conference Hall, MINECO-ah meeting pawimawh tak an nei.

Minister Dr R.Lalthangliana chuan COVID19 avangin India ram chauh ni lo khawvel ram hrang hranga sawrkar liante pawhin harsatna an tawk a, hmasawnna hna a thawh theih tak tak loh, a ti a. Amaherawhchu, COVID-19 avanga mipui mimir zingah health awareness-a kan harh mek te, HIV positive punna tlahniam te, faina kawnga kan thangharh te, accident tlahniam leh thil dang tam tak he harsatna phenah hian thil tha hmuhtur a awm, a ti. Dr R.Lalthangliana chuan Commerce and Industries hmalakna zau zia leh ken tel a ngahzia thlirin he Department hnuaia hmalaknate a kal fuh chuan Mizo te tan innghahna tlak eizawnna tam tak siam theihna kawng a awm, a ti a. Officer rual kalkhawmte ngaihtuahna thar seng tura fuihin COVID19 avanga eizawnna hloh te leh eizawnna tur dap mek thalaite tan Commerce and Industries Department huanga food processing, handloom, textile, bamboo, mineral resources leh a dangte hmangin eizawnna tam tak siam belh theih a ni, Minister chuan a ti.

Industrial Development Board Vice Chairman Pu C.Ramhluna pawhin SEDP kaltlanga an Board hmalakna thenkhat sawiin chung zingah chuan leirawhchan (brick)-a Mizoram intodelhna tur kawng zawn te, mipui mamawh ang industry din a nih theih nana rampuma survey neih te, college-a Industrial Demo Chamber din te a tel. Mizoram chhungah Multinational Company-ten thil siamna hmun an bun theihna turin kawng dap nise tiin a rawt bawk a ni.

Commerce and Industries Director Pu J.Hmingthanmawia pawhin lockdown avanga hnathawk thei lo, small and medium industry te damkhawchhuahna tur sawrkar laipuiin hmalakna thar a puan te sawifiahin heng scheme-te hi Mizoramah pawh chhawr tangkai ve theih a nih dan te, Mizoram Industrial Policy siamthat mek leh New Market building sak that tura hmalakna kal mek te a sawi a ni.

Geology and Mineral Resources, ZIDCO, ZOHANDCO, MKVIB leh Bamboo Development Agency hotute pawhin an hmalakna te leh hmachhawpte meeting hian an report bawk a ni.