No.2666/2020-2020

Aizawl, the 2nd July 2020: Vawiin khan Sports Minister Pu Robert Romawia Royte chuan Lengpui Football Playground-a Phullem (Artificial turf) phah turin Lungphum a phum.

Pu Robert Romawia Royte chuan Chief Minister Pu Zoramthanga kaihhruai Sorkar chuan Infiamnain awmze neia hma a sawn theih nan Zoramin a la neih ngailoh Mizoram Sports Policy 2019 a puang(notified) fel tawh a, Mizorama la awm ngailo; Infiammiten an lungkham leh an ngahhlelh em em Infiammi hlawhtlingte tan bika Sorkar hna 5% hauhna (job reservation) pawh a tifel tawh a ti. Eizawnna tlaka sports siam a nih theih nan Mizoram sorkarin sports hi industry nihna (status) a pek chu State dang leh Sorkar laipui pawhin tha a ti em em a ni a ti a. FICCI meuh pawhin investment plan an buaipui tan mek a ni a ti.

Sports Minister chuan Sports infrastucture hrang hrangte siam turin Sorkarin nasa takin hma a la a, Chief Minister leh Deputy Chief Minister te phurpuina zarah Aizawl Smart City project-ah pawh Sports Sector-ah hmasawnna liantham a insehmur mek a, Mizoram Sports Department chuan hun hmasa lama sum a hmuh ngailohna Central Ministry 3 atangin sum a hmu tan mek a ni a ti. Central sorkarin India ram state leh UT tam tak zing atanga Khelo India Centre of Exellence 8 (pariat) a thlanchhuah zinga Aizawl a tel ve chuan Central Sorkarin Mizoram Sorkar a rintawk zia leh Mizo infiammitea beiseina a nghahzia a tilang a ni a ti a, he Centre of Exellence hian hmasawnna tur ken tel tam tak a nei dawn a, a lungphum phum tur pawhin Union Sports Minister a sawm tawh thu a sawi.

Sports Minister chuan hmasawnna ruhrel a pawimawh angin sports promotion lam pawh a pawimawh a, awmze neia hmasawn turin Coach training leh sports school changtlung tak tak din a ni dawn a, hemi atan hian Central Sorkarin sum pawh min sanction-sak tawh a ni a ti.

Sports Minister chuan Covid avanga rei tak hnathawk thei lova mipui an awm avangin sum leng vak a tlem a, chu chu mirethei ten an tuar nasa hle tawh a, hetiang a nih avang hian Central sorkar atanga hmasawnna sum hmuhte hi hman zung zung a tul a, chu chuan instalment dang leh sanction thar a hip chhuak dawn a ni a ti.

Lengpui Football Playground phullem phah a ni tur chu Lengpui thalaite leh a hmang tangkai tur zawng zawngte a lawmpui tih sawiin, a taka a chan theih nana thawkrim em em Bialtu MLA Er H.Lalzirliana pawh a lawmpui tak zet a ni a ti. Minister chuan Artificial Turf-ah quality chi hrang hrang a tam a, a into hleihin a inthat hleih hlawm hle, chuvangin Sports Department-in Phullem a phah tur reng reng chu FIFA Certification Protocol kaltlang zo a ni tur a ni a, chutiang tling phalo satu contractor chuan an Bill 10% an chân ngei tur a ni a ti.

Khualzahawm Er. H.Lalzirliana, Bialtu MLA & Vice Chairman, Road & Infrastructure Development Board pawhin a bial chhung Lengpui khua, Aizawl atanga hnaitea khelmual phullem phah a awm tur chu lawmthu sawiin, Sport Minister hmalakna fakawm a tih thu a sawi a, neitu rilru pua duat leh tangkai taka hmang turin Lengpui khawtlang leh bial mipuite a sawm a ni. He hunah hian Pu T.C.Pachhunga,Vice Chairman, Sports, Youth Affairs and Tourism Development Board leh Pu H.Lalengmawia, SYS Secretary pawhin thusawina hun an hmang bawk a ni.

He project atana Technical Report hi Pu C.Laltlanthanga,Secretary, MSSC-in pein Field chu a dunglam 110 metre leh a vanglam 74 metre niin, Rs. 500/- lakh senga sak tur a ni a, a sum hi 100% Ministry of Sports & Youth Affairs-in Khelo India Scheme hnuai atanga a sanction a ni a ti. MSSC Secretary chuan ni 26.2.2020-ah work order tihchhuah tawh a ni nain Lockdown-in a zui avangin bultan mai a nilo a ni a ti. Tender chhangtute zing atangin Decor India - Complete Sports Solution, Guwahati te chu thlan an ni a, SAI hnuaia contractor an ni a ti.