No.2665/2020-2020

Pu K Lalrinliana, LAD Minister chuan vawiin khan a bial Kolasib Assembly constituency huam chhung a Village Council pathum Pangbalkawn, Meidum leh Bairabi-a MLA-LAD fund, State Finance Commission Grant, Excluded Area Grant leh MGNREGS hnuaia hmalakna a endik.

Minister Pu K Lalrinliana chuan,"Mahni veng chhunga kan hmalakna hrang hrangte hi mite entawntlak leh ram tan a ro tling ni turin kan hlenchhuah a, kan enkawl chhunzawm a ngai a ni," a ti a, Kolasib Assembly Constituency hnuaia MLA-LAD fund, State Finance Commission Grant leh Excluded Area Fund hmangte a hmalakna hrang hrang a endik mekna ah hna a that tawk thu leh siam that ngai te pawh bawhzui zel a nih thu a sawi bawk a ni. Minister chuan hna a endikna a VC leh khawtlang hruaitute a kawmnaah, Covid-19 hri leng vangin Sawrkar hmalakna tam tak chu duh anga kalpui a theih loh a ni, a ti a. Food, Civil Supplies & Consumer Affairs Department hmalakna thenkhat te tarlangin, inkharkhip chhunga buhfai leh LPG mamawh ang kan hmuh theih nan tha thlah lovin theihtawp chhuah a nih thu a sawi. SEDP hnuaiah ruahmanna tha tak tak a awm tih sawiin tihpuitlin a nih theih nan Sawrkai laipui pawh dawr a ni tawh, a ti a, a hmahruai tur pilot project engemaw zah kalpui a nih thu leh Fisheries department hnuaiah Dumlui, Kolasib-ah Chakai farm siam niin enchhinna neih mek a nih thu a sawi bawk a ni. Minister chuan Mizoram district hrang hrangah sangha humhalhna kalpui thin a ni chu entawntlak a tih thu a sawi a, Kolasib district chhung a lui luang tam tak a sangha te pawh humhalh tur a hmalak a, eizawnna tlak leh zin mite hip thei tur khawp a cheibawl theih a nih thu a sawi bawk a ni.

A bial chhung a PMAY(G) insak tanpuina hmang a in satu thenkhat tlawhin, tih tak takna nena beitute tan in leh lo tha tak neih theihna a nih thu a sawi a, sawrkar atanga puihna an hmuh hnu a an mahni mawhphurna an hlenchhuah ve avanga in tha tak chenna tlak an nei chu a lawmpui thu a sawi bawk a ni.

Minister hian a bial fanna a a thil endik zingah Pangbalkawn Middle School inchung MLA-LAD fund hmang a sak, Meidum-a kawng zauhna, lungrem, Community Hall leh Waiting Shed te a endik a, Bairabi-a Kawngzauhna, waiting shed, tanky leh side drain te a tel a ni.

Minister hi Pu ST Lalhmingmawia, DLAO, Pu Neng Thianlal, BDO, Bilkhawthlir leh Pu Hmingthanzuala, DIPRO, Kolasib ten an tawiawm a ni.