1327/2023-2025
Aizawl, August ni 1, 2023: Vawiin khan Aizawl District huam chhunga Ruihhlo Do Ni programme, Aizawl District Level Task Force on Ruihhlo Do buatsaih chu Vanapa Hall ah neih a ni a. He hun hi Social Welfare & Tribal Affairs Minister Er. Lalrinawma chuan khuallian niin a hmanpui.

He programme hi ruihhlo do tura infuihtharna leh intuaitharna ni atana ruahman a ni.

Khuallian chuan thu sawiin District Level Task Force on Ruihhlo Do in kawng hrang hranga hmalakna a neihte chu lawmawm tiin, an thawk tha hle nia a hriat thu a sawi a. Ruihhlo do hna hi do hneh har tak angin lang mahse tha thlah theih a nih loh thu a sawi a. Tha kan thlah rual chuan tuna kan harsatna tawh aia nasa zawkin min tuam nghal dawn tih hriain, theihtawp kan chhuah a, kan tanrual a pawimawh takzet a ni, a ti a. Thangthar te ruihhlo bawihah an tan loh nan chhungkua atanga bultan a pawimawh thu Social Welfare Minister chuan sawiin, nun zahawmna vawnhim te, mahni inthununna leh harsatnate chu chonaah lak a hneh tumna te chu mahni nun a vawn tlat a pawimawh thu a sawi. SW&TA Minister chuan ruihhlo do hna chu mi tu te emaw bik tih tur chauh nilovin, kan zavai hian tih theih leh tih tur kan nei tih hriat thar leh pawimawh a ngai a tih thu a sawi a. A hmatawng a awmte phei chu an hah hle a. heng zawng zawngah hian tangrual sauh sauha hma lain, tihnualtu nilova a tiphurtu nih tuma tawngkam te ulukin, theihtawp chhuah tlan a pawimawh takzet a ni, tiin Minister chuan kalkhawmte a fuih a ni.

District Level Task Force on Ruihhlo Do Ex-Chairman Dr. Lalhriatzuali Ralte chuan sawrkarin ruihhlo do kawnga a hmalakna te leh ruihhlo do a tul zia te a sawi a, Sawrkar hmalakna chu khawtlang leh vengchhung tanrualnaah a innghah thui thu a sawi a. Zirna inah thalaite bula awareness neih a nih thin dan leh ngaihpawimawh a tul zia a sawi.

Central YMA President Pu R. Lalngheta pawhin thu sawiin, Mizote hi hnam huaisen inti mah ila ruihhlo in min sah chah chuan hnam ral tur dinhmunah kan ding thei a ni tiin, ruihhlo do hlawhtling tur chuan midang rin emaw inlak ralban mai chi a nih loh thu leh, mi tin mawhphurhna a ni tih hriat tlan a tul thu a sawi.

He hun hi Pu Isaac C. Lalrempuia, Addl. DC in a kaihhruai a. Prof. Malsawmliana, Member Secretary, District Level Task Force on Ruihhlo Do chuan report pe in, Ruihhlo Do tih thupui hmangin Pi Vanlalhruaii, Mizoram Social Defence & Rehabilitation Board, Task Force tan a Master Trainer ni bawk chuan “Ruihhlo Do” tih thupui hmangin presentation a pe bawk. Inkhawm hi MJA Vice President Pu Lalremsiama, District Level Task Force on Ruihhlo Do member ni bawk chuan lawmthu sawiin a khar a ni.

Vawiin programme-ah hian Pi Nazuk Kumar IAS, Aizawl Bawrhsap leh Pu Rex Zarzoliana, SP Aizawl District te an tel bawk a. Pi Nazuk Kumar hian vawiin atangin District Level Task Force on Ruihhlo Do Chairman chanvo a la nghal dawn a ni.

He hunah hian Aizawl District huamchhunga YMA Branch aiawh mi pahnih theuh, MHIP leh Local/ Village Council aiawh pakhat theuh an kal a. Central YMA leh MHIP Gen. Hqrs leh MUP Gen. Hqrs hruaitute bakah Sawrkar Department thenkhat aiawhte an tel bawk.