1383/2023-2024
Kolasib dated 4th August 2023: Vawiin chawhma khan DC Conference Hall, Kolasibah 'District Level Task Force on Ruihhlo Do' chuan ṭhutkhawmna neiin Kolasib district chhung a ruihhlo tih remna tur a hmalak dan tur sawi hona neih a ni a. Er. Lalrinawma, Minister, Social Welfare & Tribal Affairs Department chuan he hun hi telpuiin Pu John LT Sanga, Deputy Commissioner chuan hun a kaihruai a ni.
Minister Er. Lalrinawma chuan ram leh hnam hmasawnna daltu lian tak chu ruihhlo a nih thu sawiin chhungkua leh khawtlang zalen leh nuam siam tur chuan ruihhlo do a pawimawh thu a sawi a. Ruihhlo tih remna tur a hmalakna beihpui thlak nan State Level Core Committee din a nih thu leh chumi hnuai ah District Level leh Village Level-te awmze nei tak a kalpui tur a duan a nih thu sawiin he hmalakna tihlawhtling tur hian Sawrkar, kohhran, tlawmngai pawl leh khawtlang hruaitute thawhhona a pawimawh thu a sawi bawk a ni.
Thutkhawmna ah hian Pu David JB, Addl. SP chuan kumin chhungin Kolasib, Kawnpui, Bairabi, Vairengte, Bilkhawthlir, Saiphai ah te zirlai 2506 hnen ah Ruihhlo ṭhat loh zia inzirtirna pek tawh a nih thu a tarlang a. Kolasib district chhung a inenkawlna Home hrang hrangah ruihhlo vang a enkawl mek mi 554 an awm mek thu leh ruihhlo kaihhnawih ah mi 5 man an nih dan leh ruihhlo Cheng nuai 16 chuang man man a nih thu a sawi bawk a ni. Pu VL Muana, Asst. Commissioner, Excise & Narcotics Department chuan rakzu litre 1788, sap zu um puitling 7191, beer can 3876, Heroine 2.01 kg leh Methamphetamine 734.78 gram man a nih tawh thu sawiin NDPS Act 1985 hnuai ah case 18 leh MLP Act 2019 hnuai ah case 1754 ziah luh a nih thu a tarlang bawk a ni.
District Level Task Force on Ruihho Do thutkhawmna ah hian zirna in hrang hrang leh kohhran program-ahte Ruihhlo ṭhat lohna leh ruihhlo lak a fihlim tur a inzirtirna kalpui dan tur te, zirtirna pe turin District tin atanga Resource Person ruat a nih tawh thu te, Anti-Drugs Club din a ṭul thu leh veng tin ah ruihhlo do kalpui nan Village Level Committee din a ṭul thu sawi lan a ni a. Sub-Headquarters YMA leh YMA branch hrang hrang hmalaknate ngaihthlak a ni bawk.
