939/2023-2024

Aizawl, the 27th June 2023 : Mizoram Pig Producers’ Cooperative Federation (PIGFED LTD) chuan vawiin hian ANNUAL GENERAL MEETING vawi 28-na Vety Polyclinic Hospital Conference Hall, Khatla ah a hmang a. Er. Lalrinawma, Minister, A.H & Vety. chu khuallian niin, hun hi a hmanpui a. Pu Lalmuanpuia, MLA chu khualzahawm a ni.

Khuallian Er. Lalrinawma chuan kalkhawmte hnenah thuchah sawiin Primary Society te chu ram leh hnam intodelh theihna tura hmalakna fawng pawimawh berte zinga mi an nih avangin, Society member-te tanrual a pawimawh thu a sawi a. A bul thut dawmkan hi hmasawnna a ni tiin Sawrkara Project thehluh reng rengte pawh Primary Society-te dawmkang zawnga hmalakna a nih chuan ngaihpawimawh a nih zel tur thu a sawi bawk. ASF hri vanga harsatna tawkte a tuarpui thu sawiin, hun harsa a liam meka, beiseina nen tluang taka kal leh thei turin kalkhawmte chu duhsakna a hlan a ni.

Khualzahawm Pu Lalmuanpuia, MLA hnen atangin thuchah tawi ngaihthlak zui niin Mizo Society-ah vawk vulhin hmun thuk tak a luah reng thu sawiin, sawrkar pawhin a ngaipawimawh reng a, kum 2018-a SEDP hmalaknaah pawh a hmasa berte zingah dah a nih thu a sawi. Vawk hrileng vanga harsatna vangin sawrkar hmalakna beisei anga kal tha theilo chu pawi a tih thu sawiin, vawkhri avanga harsatna tawkte tanpuina turin sawrkarin theihtawpa chhuah reng thu a sawi bawk. Society te hmasawnna turin Sawrkar chuan theihtawp chhuahin a tih tur a ti zel dawn a ni a ti.

Vety Director Dr. Lalrinpuii Sailo hnen atangin thusawi tawi ngaihthlak a ni a. ASF vawk hrileng vanga hun harsa tak an tawh hnuah Society ten vawk vulha eizawnna chawisanga theihtawp an chhuah tlat chu lawmawm a tih thu a sawia, PIGFED tana A.H & Vety. Department hmalakna hrang hrangte tarlangin, Ran chaw man to avanga harsatna vawk vulhtu ten an neih hre rengin ran chaw siamna (Animal Feed Plant) Sihhmuiah din belh mek a nih thu a sawi bawk. A.H & Vety. Dept nena thawhhona tha tak nei a, hmasawnna nei zel turin kalkhawmte chu duhsakna a hlan a ni.

Chawhnu lamah Business session hman niin, Official Agenda te leh Primary Society atanga agenda lutte sawihona hun hlawkthlak tak hman a nih hnuah 2023-2028 atana hruaitu thar tur (Board of Directors) thlanna hun hman a ni.

Annual General Meeting hi PIGFED Ltd. Chairman Pu F. Zosanga’n a kaihruai a, Pu V. Lalchhuana, Board of Director, PIGFED Ltd. chuan Pathian hnena Meeting hlanna hun a hman hnuin, Dr. Rosangzuala, Managing Director, PIGFED Ltd. hnen atangin kum 2022-2023 chhunga PIGFED Ltd. hma lakna hrang hrang Annual Report kimchang taka ngaihthlak a ni.

PIGFED Ltd hnuaiah hian affiliated Primary Society 163 awm mekin member 4000 chuang lai an awm mek a. Annual General Meeting-ah hian palai 158 lai an kalkhawm a ni.