219/2023-2024
Aizawl, 26th April, 2023 : Nizan (thawhlehni) khan Women & Child Development Minister Er. Lalrinawma'n Cultural Centre Cum Auditorium, Vaivakawnah hmeichhe chunga hleilenna lantirna film "PINE HILL" a tlangzarh.

He hunah hian Minister Er. Lalrinawma chuan hmeichhiate chuan himna leh thlamuanna an mamawh thin thu sawiin, naupangte pawn an thil dawn theih hlu ber chu nu hmangaihna a ni a, an pasal ten chu chu nupuite an enkawlna kawnga an hriatreng a pawimawh hle a ni a ti a. Hmeichhiate chunga hleilenna tam ber hi mipate vang a ni a, chutiang a lo awm changin thuhretu dik a tang ngamlo an awm thin avangin thil tisualtu an zalen leh fo thin a, chutiang a nih loh nan thuhretu huaisen taka tan ngam zel a pawimawh tih tarlangin, mahni mihringpuite himna tur leh thilsual titute hrem an nih theih nan huaisen takin thuhretuah tan ngam zel turin mo zawng zawng a chah a, hmeichhiate himna, thlamuanna leh chawikanna kawngah theihtawp chhuah hi kan tih makmawh a ni Minister chuan a ti a ni. Zalen tak leh thlamuang taka hmeichhiate awmtir theitu chu keini ho hi kan ni a, kan kiang maiah mangang thlabar, puitu mamawh an awm laia tui taka lo muthilhsan hi khua leh tui tha, ringtute tihtur a ni thei dawn em tih mahni inzawt theuh tura kalkhawmte chahin, hleilenna ti tawp tura theihtawp chhuah tlanpuiah a sawm a ni.

He huna thusawi tu dang, Pi Zoramthangi Chhangte, Director, Women & Child Development chuan hmeichhiate an him zawk theihna tura dan siam hrang hrangte tarlangin, tun dinhmunah District tinah hleilenna tuar hmeichhiate pan thin tur Protection Officer dah vek an ni a, sawrkar laipui chuan hmeichhiate’n in lam leh khawlaia chhaih nawmnah/kutthlak leh kutpalh an tawrh fona do letna atan programme “Nirbhaya Fund” tia hming vuahin a duang tih a sawi a. Sawrkar laipuiin heng programme a duan dan tlangpuite chu a sawifiah a -
1) Women Helpline no. 181 - Harsatna tawk hmeichhiate’n engtik lai pawhin, eng hunah pawh (24x7) a biak pawhna tur a ni a, anni’n kawng an lo kawh hmuh thin ang.

2) One Stop Centre (OSC) - hei hi District thar pathum tih loh District 8 ah kalpui mek a ni a, hmeichhia tupawh in lamah emaw khawlaiah emaw hleilenna leh khuaikhem tuarte in humhimna tur hmun, ni 5 leh zan 5 riah theihna tur leh a tul anga hma lo lakpuitu turte an ni a, 24x7 in an in hawng reng a ni.

Women & Child Development department data ah chuan Helpline in phone call an dawn zawng zawng zinga zaa 53.4 chu harsatna tawktu ngeiin an biak a ni a, mi za zela 46.6 te chu midangin an biak sak a ni. Heng phone call an dawn zawng zawng zinga 67.4% te chu Aizawl khawpui chhung atangin a ni a, Aizawl khaw pawn atang za zela 32.6% phone call an dawng. Case an register za zela 48 te chu hmeichhia, hleilenna tuar, tanpui ngaite an ni. Chung hmeichhe puih ngai an lo puihte zinga zaa 44 te chu pasal pawmlai nei niin, harsatna tuarte zingah kum 21–40 inkar a tam ber an ni a, chu chu 60% an ni. Hleilenna tuartu zinga zaa 31 te chuan kut an tuar a, tawngka dengkhawng taka inhauhna tawk mi za a 38% an awm bawk a ni. Zu vanga hleilenna tawk za a 21% an awm bawk. An pasalte atanga hleilenna tawk an tam ber a, za zela 68% lai an ni. One Stop Centre a harsatna tawk inhumhim tura tlan lutte zinga 58.5% chu hleilenna, kut tuar chhanhim ngaite an ni.

Pu C. Remmawia Producer, Pine Hill pawhin he hunah hian thu a sawi a. Mizo zaithiam leh film lama thawhhlawk tak takte bakah sawmbik official leh mithahnem tak an tel a ni.