218/2023-2024

Aizawl the 26th April, 2023 : Tourist Guide Federation of India (TGFI), India ram pum huapa Tourist Guide zawng zawng khaikhawmtu pawl lian ber chuan May ni 25-26, 2023-ah hian Mizoram Tourism Sponsor in Aizawl-ah an 24th Annual Convention an hmang dawn.

He 24th Annual Convention-hi Dawrpui Multipurpose Hall-a nghah tura ruahman niin India ram hmun hrang hrang atangin palai 150 vel lo kal an tum a, Mizoram a Tourism Service Provider-te (Tour Operator, Travel Agent, Tour Guides, Accommodation Units etc) te nen mi 200 vel he khawmpuiah hian tel tura beisei an ni.

He khawmpuiah hian Mizoram Chief Minister Pu Zoramthanga chu Khuallian tura beisei niin Tourism Minister Pu Robert Romawia Royte bakah sorkar hotu lianten an tel pui bawk ang.

He khawmpui hi International Tourism Mart 2022-in a hrinchhuah niin ITM ang thova Mizoram Tourism thehlarna atana tangkai tak tur a ni dawn a. TGFI member-te hi Tour Guide an nih bakah Tour Operation tamtak buaipuitu an nih tel avangin mikhual tamzawk an rawn hruailuh ngei beisei a ni.

He khawmpui atana senso hi Mizoram Tourism leh TGFI tangkawpin an tum dawn a ni.