217/2023-2024

Dated Serchhip, the 26th April, 2023: Vawiin khan Serchhip Sub-Headquarters YMA Inkhawmpui vawi 7 na vantlang inkhawm, Chhingchhip Venghlun Khelmuala Hrangliana Runah buatsaih a ni a. Tuikum bialtu MLA Er. Lalrinawma, Minister, Social Welfare & Tribal Affairs, etc., chu khuallian a ni.

Thusawiin khuallian chuan, duhsakna ropui tak Serchhip Sub Headquarters YMA ten an chantir avangin lawmthu a hrilh a, kan ram tana YMA hlutzia hi sawifiah rual a ni lova Pathianin YMA min pek avang hian khawvela ram leh hnam nihlawh berte zinga mi kan ni, a ti. Ram leh hnam humhalh duhna avangin zalenna kan sual a, kum sawmhnih chhung teh meuh mai harsatna chhumin min chim a nih kha. Vawiinah erawh chuan inremna duhawm, Danpui hnuaia humhim ram kan lo nei ta a, zalenna suala kan ramin ke a lo pen tawhna kha a thlawn lo a ni, a ti. Tunlaiah eizawnna kawng chi hrang hrang kan dap kual nasa hle mai, a tha e, kan tihtur dik tak a ni. Amaherawh chu kan eizawnna thlan hi kan hnam himna leh inlungrualna tiderthawng thei chi anih chuan i hnar ngam ang u. He hnam, he chi hi a ral chuan nang leh kei hi kan damchhuakin kan ding chang bik thei dawn chuang lo a ni, tiin YMA member te a sawm a. Kan hnaivaia hnathawh tur awm remchang kan dap thiam a tul hle a, kan kawtkaiah ngei hnam dangten eizawnna tha tak tak an thawh reng laiin thawh tur zawngin kei hi ka lo hawihai reng em tih inzawt ang u. Kan ei hmuhna a nih phawt chuan eng hna mah hi hnuaihnung bik a awm lova, kan sira thawh mai theih hnate iai lova kan thawh mai hian kan ram leh hnam kan humhalh tel nghal a ni, a ti. Tin, kan hnam a ral mai loh nan fa neih tam uar a tul tih sawiin, mi tam takin ei leh bar harsatna chhuanlamin fa ngah an hreh thin nimahsela kan fate hi chawm tur Ka nen chauh a rawn piang bik lova, hnathawk thei turin kutke kimin an lo piang thin zawk a ni, chawm tur kan pungah ngai lo ila thawktu tur kan pung zelah i ngai zawk ang u, a ti a. Kan hnam ziarang leh kan tawng hi a ral rualin keini hi kan ral ve nghal dawn a ni tih hriain kan hnamze tinte hi zahpui tur a ni lova, kan tawngte hi hmang tlem tial tial tur a ni hek lo. Kan chetze tinrengte kan uarin kan tawng te hi kan zirna inah leh kan nitin nunah kan uar deuh deuh zawk tur a ni a. India sawrkar pawhin tribal te ziarang leh tawngte hi a riral mai ang tih hlauvin Ministry of Tribal Affairs a din hial a, hei hi i hmu thiam ang u, tiin Mizo hmam zia leh tawng uar deuh deuh a tulzia a tarlang bawk. Er. Lalrinawma chuan thalaite zinga HIV/AIDS hluar lutuk chu a vei hle tih sawiin mipat hmeichhiatnaa kan him tawk loh vang a ni ber a, nula te chauh pasal neih hmaa thianghlim tura beisei lovin tlangval te zawk hian thianghlim taka nupui nei thei nih kan tum a tul a ni, a ti bawk.

Vantlang inkhawm hi Pu K. Laltlanmawia, Asst. Secretary, Sub Headquarters YMA in a kaihruai a, hunserh Pastor D. Zobiaka'n hmangin zaithiam leh zaipawlten hun an hman bakah Pu Lalrammawia, Vice President chuan thusawina hun a hmang bawk. Chawhnu lamah Variety programme leh zan lamah Vantlang inkhawm buatsaih leh a ni ang a, naktuk chawhmaah rorelna neiin chawhnu lamah hruaitu thar thlanna an nei ang a, naktuk zanah hian palai thlahna inkhawm buatsaih lehin inkhawmpui vawi sarihna hi a tiak ang.

Serchhip Sub Headquarters YMA hnuaiah hian thuthmun branch 28 leh Group YMA pathum; Tuichangral South, Tawitlang leh Vantawng group te hnuaiah branch 46, an vaiin branch 74 an awm a, member zawng zawng hi 38154 an ni. Sub Headquarters hnuaiah hian Committee peng hrang hrang sawm leh pathum awmin heng committee te hmang hian hmalakna tam tak an kalpui thin. Kumpuan thupui atan hian a tum sawm leh pangana atan "Ram leh Hnam Humhalh" chu hman mek a ni.

Naktuk ni 26.04.23 hian rorel inkhawmah hian YMA leh Mizoram Building & Other Construction Workers Welfare Boards te thawh hona ennawn chungchang te, Serchhip District Hospital-a a mamawhtute tana Sub Headquarters YMA in kuang dah chungchang te, Sub Headquarters YMA Office a driver lak thu te leh sawrkar khawih agenda pahnih The Mizoram (Land Revenue) Act, 2013 sawi anga Tribal in non Tribal hnena in hmun lo ram hralh leh pek khapna dan khauh zawka hman a nih theih nana hmalakna thu leh Serchhip leh Sailam inkar kawng siam that chungchangte an ngaihtuah ho dawn a ni.