1283/2023-2024

Aizawl, July ni 26, 2023: National Commission for Women bultumin vawiin khan "Safety for domestic employees and other" tih thupui hmangin Mizoram State Commission for Women leh Women and Child Development,  Mizoram tangkawp chuan India hmarchhak state huap Regional Level Seminar a buatsaih. He seminar, Assembly Annexe Conference Hall a neih hi Social Welfare Minister Er. Lalrinawma chuan khuallian niin a hawng a. He regional seminar chhim tur hian Assam, Arunachal Pradesh, Tripura, Nagaland leh Meghalaya atangin an state Women Commission theuh aiawhte an lo kal bakah hmarchhak state engemawzat atangin he seminar chhim tur hian state police officer an lo kal bawk.

Mizoramah hna indaih loh tak em avangin hmeichhiate ram pawnah hna zawnga chhuah a tul ta fo a. A bikin Damdawi In-a nurse hna thawk tur te, Spa leh Salon, House-maid leh hna hrang hrang thawk turin ram dang pan an tam ta hle a. Hetiang a nih takah chuan Private Placement Agencies te pawh an awm ta nual a. Mizoramah pawh hmeichhiate hna zawnpuiin hmeichhe tam tak heng agency te hian ram dangah an thawn chhuak thin a ni. Ram pawna hna thawka chhuak te hian training an neih lai atanga harsatna leh buaina tawk te an awm a, an thawhna hmuna harsatna tawk pawh an awm nual thin a, an harsatna tawh hian mahni taksa zawrhna lamah te pawh a hnuk lut fo thin a ni. Hetiang dinhmun a thlen tak avang hian North East States te chu tangrualin dan (law) neih te tangkai zawkin leh hman a nih dan tur ang taka hman a nih nan hma la in, Private Placement Agencies te pawhin registration felfai tak an neih a, dan an zawm a, hemi lama thawkte pawh a hma aia chak zawka thuam that an neih theih beiseiin Regional Level Seminar hi buatsaih a ni.

Khuallian chuan state chhung leh pawn atanga seminar chhim tura kalkhawm chu lawmna thu sawiin, he inkhawm pawimawh tak hian rah tha a chhuah ngei a beisei thu a sawi a. Hmanah chuan hmeichhiate chu inah awmin, nau awm leh inchhung sekrek khawih chu an kutah a awm thin a, hun inthlak danglam zelah hmeichhe tam takin eizawngin nitin in an chhuahsan a lo ngaih takah chuan inchhung tihfai te, eirawngbawl, nau awm leh adangte ti tura midang rawih mamawhna a lo san tak thu a sawi a. Hei hian thawh tur mamawh tam tak tan inhlawhna kawng siam phah mahse, hmun thenkhatah chuan dikna inrahbehsakna te a awm thin a. Heihi a pawi takzet in, heng 'domestic worker' te dikna leh zahawmna humhim a nih nan leh hemi kawnga harsatna hrang hrangte sukiang tura vawiina NCW leh MSCW tangkawpin zirhona an buatsaih chu lawmawm a tih thu a sawi.

Seminar hawnna inkhawm hi MSCW Chairperson Pi Lallawmchhungi chuan a kaihruaiin kalkhawmte lawmna thu a sawi a. DGP Pu Anil Shukla chuan thu sawi bawkin, India ramchhunga domestic worker te dinhmun leh harsatna tawh hrang hrangte a tarlang a. A then chu a ruaitu te'n hlawh an pek that loh te, zingkar atanga zan rei tak tak inchhawr leh ei tur in pek that loh report a awm thu te a sawi a. Mizoramah pawh agency rintlak loh kaltlanga state pawn leh ram pawn thlenga hna tha leh hlawh tha tak tak an hmuh theihna tura thalaite thlem a, dinhmun khirh taka an awm tak thu te sawiin, Mizoram Police pawhin heng case te hi bawhzuia thalai tam tak chhanchhuah an nih tawh thu a sawi a. Chutihrual chuan report loh tam tak a awm theih thu sawiin fimkhur tlan pawimawh a tih thu a sawi a. Awmpuia inhlawh turte dikna hum tur chuan heng placement agency te hi dan hnuaiah uluk taka endikna nen din a, worker te pawh tha taka an thawh theih nan an mamawh training te pek a, an dinhmun enzui zel te tha a tih thu a sawi.

Women & Child Development Director Pi Zoramthangi Chhangte pawhin thu tawi sawiin, India chu a ram pum anga en pawhin domestic worker te dinhmun that lohna ram a nih thu a sawi a. Domestic worker te dinhmun a lo that zawk theih nan a ngaihtuah sen pawimawh a tih thu a sawi.

Hawnna inkhawm neih zawh hian Moderator I&PR Director Pi Mina Zoliani kaihhruaiin mi thiam hrang hrangte hnen atangin thupui zirhona leh sawihona neih a ni a. SP Aizawl Pu Rex Zarzoliana chuan 'Human Trafficking in Mizoram' chungchang sawiin, Pi Gracy L. Bawitlung, Additional District & Sessions Judge, Aizawl chuan 'Safety for Domestic Workers and other Employees : The Legal Framework' chungchang a sawifiah a. Prof. Lalhriatpuii, Economic Department, Mizoram University chuan 'The Trajectory of Women Domestic Workers: An Economic Perspective' tih thupui hmangin thu a sawi a, Dr. Henry Zodinliana, Associate Professor, Department of Social Work, MZU chuan 'Sexual Exploitation of Women and Girls in Mizoram' chungchang sawiin 'Welfare of Domestic Workers' chungchang Sr. Ruth Zonunthari, Director, FIWDC, Peace Home hnen atangin ngaihthlak a ni bawk.

Heng bakah hian State hrang hrang atanga State Commission for Women aiawh lo kal te, police leh district administration lam atangin domestic employee kaihhnawiha report an lo dawn tawh leh hmalaknate bakah thu pawimawh tak tak dang sawiho a ni bawk. Pi Zonunpari, Member Secretary, Mizoram State Commission for Women chuan lawmthu sawiin he ni khat awh seminar hi a khar a ni.