1284/2023-2024

Aizawl, 27th July, 2023 : Higher & Technical Education Minister Dr R. Lalthangliana'n vawiin khan Govt. J. Thankima College (GJTC) in NAAC Accreditation A+ Grade an hmuh lawmna inkhawm Vanapa Hall-a an buatsaih chu khuallian niin a hmanpui a, National Education Policy, 2020 leh RUSA 3.0 in a phut angin State University kan neih theihna turin hma an la nghal tih a sawi.

Minister Dr R. Lalthangliana chuan thuchah sawiin Govt. J. Thankima College (GJC) in NAAC assessment “Grade C” atanga “Grade A+” an hmu chu hlawhtlinna ropui tak, awlsam taka chan mai theih a ni lo tih sawiin, Grade hrang hrang 4 zuan khum thei khawpa hma an sawnna leh an tumruhna hi a chhuanawm takzet tih sawiin, Mizoram tihmelthatu an ni, a ti a. Grade A++ hmu thei tura tun atanga tan la tura fuihin theihtawp a chhuahpui tur thu a sawi a ni.

Minister chuan Rashtriya Uchchatar Shiksha Abhiyan (RUSA) 3.0 leh National Education Policy (NEP), 2020 hnuaia Mizoram chunga College hrang hrang ten hamthatna an dawn theihte chu State University hnuaia awm an nih loh chuan an dawng thei tawh dawn lo tih sawiin, hemi tur hian hma kan la nghal a, nimin lamah pawh Mizoram University-ah mithiamten sawihona hun hmangin an zirchiang a, tun sawrkar kal lai mek hian thla tam hun a neih tawh loh avangin thui tak a kal theih hmel loh a, amaherawhchu State University nei tur hian hma kan la nghal a ni, a ti.

Govt. J. Thankima College hian NAAC Assessment vawi 3 a hmachhawn tawh a- 1st cycle (2007) khan 'C++' grade an hmu a, 2nd Cycle (2016) khan 'C grade an lo hmu tawh bawk a ni. A vawi thumna 3rd Cycle hi December ni 15-16, 2022 khan an hmachhawn a, hetah hian A+ grade hmuin CGPA -3.37 an hmu phak a, hei hi Mizoram sawrkar enkawl college zinga grade sang ber al a ni rih a ni. He Accreditation hi December ni 19, 2027 thleng a nung ang a, hemi hnu hian NAAC assessment an hmachhawn leh ang.

Govt. J. Thankima College hi kum 1992 ah din a ni a. Lalhmingthanga College, Durtlang (1.4.1992 a din) leh J.Thankima College, Bawngkawn (9.9.1993) a din te chu Mizoram sawrkarin college pakhatah chhun finin November ni 11, 2002 khan deficit ah a hlang kaia, a hmingah "J. Thankima College" tih a ni a. 14.8.2007 ah Mizoram University hnuaiah permanent affiliation an hmu a, "Govt. J. Thankima College" tih a ni ta a ni. GJTC hian Campus hmun thumah a nei a, Durtlangah North Campus neiin Mipa hostel leh Indoor Sport building te a awm a, Bawngkawn Lunglei road ah South campus neiin, Hmeichhe hostel a awm a, Bawngkawn Brigade ah central campus a awm a, hetah hian Administrative building, Class room leh Library te a awm a ni.

College hian Zirlaite hman theih turin sport facilities hrang hrang Volley Ball court, Basket Ball Court, Table Tennis khelhna te a nei a, zirlaite hahchawlhna rest shed a nei tha hie bawk. Class room zawng zawng te ICT facilities tha taka thuam a ni bawk.

Govt. J. thankima College ah hian Under Graduate Arts subject 7 leh Management (BBA) te a zir theih a. Mahni a in tum chawpin (self financing) Management department hi kum 2018 atangin kalpui a ni a, Geography Department hi kum 2020 atangin kalpui a ni bawk. Zirlai mipa leh hmeichhia tan Hostel a hran ve ve in an nei bawk a. College Library pawh Mizoram a college zingah E-resource centre nei awm chhun an ni.

He College ah hian kum 2023-2024 Academic session atan zirlai 1100 an awm a, Zirtirtu 41 leh office lama thawk 14 an awm mek a ni.

Vawiin programme hi Pu B. Lalzarzova, Chairman, SWA GJTC in a kaihruai a, GJTC Principal Pu JV Nunchunga'n inlawmna thu sawiin, Pi Rebecca Khiangte, Coordinator, IQAC in NAAC peer team hmachhawn tura an inbuatsaih dan leh hlawhtlinna an hmuh dan report a pe a, GJTC Vice Principal Pu Lalthlamuana'n lawmthu sawiin hun a khar a ni.