3424/2022-2023

Aizawl, 31.01.2023: Vawiin Social Welfare & Tribal Affairs Minister Er. Lalrinawma chuan ZMC Girls Hostel Falkawn ami chu a hawng.

Minister Er. Lalrinawma chuan Social Welfare & Tribal Affairs Department chu state in hmasawnna a hmuhna leh a chhawr ber te zing a mi a nih thu a sawi a. Hmasawnna leh inrelbawlna tha kawng zawh zel tur chuan mahni chanpual leh mawhphurna theuh tha taka kan hlen thin a pawimawh thu sawi bawkin, kan mawh phurna kan hlen loh hi hmasawnna ti thuanawptu a ni, a ti a. Ram leh hnam tana theihtawp chhuah pawimawh thu sawiin, nunna hial pawh hlan ngamte an awm tih hre reng chungin, vawiina mi te hian mahni zawnah theuh ram leh hnam tan theihtawp chhuaha thawk zel turin kalkhawmte a sawm a ni. Social Welfare Minister chuan vawiin hawn tak Tribal Hostel puitlin a nih theih nan a Falkawn vengchhung thuneitute leh ZMC lama thawkte tawiawmna chungah lawmthu sawiin, mahni ta angin an enkawl zui zel a beisei thu a sawi a, tangkai taka hman a nih a beisei thu a sawi a ni.

Aizawl South-III bialtu MLA Prof. F Lalnunmawia, Vice Chairman, Horticulture Development Board ni bawk pawhin thu sawiin, sawrkar hmalakna in ZMC ah hmasawnna tam tak a taka hmuh tur a awm zel chu lawmawm a ti a. Zirlai te tana tangkai tak tur Girls' Hostel neih theih nan a Health & Family Welfare Department leh Social Welfare & Tribal Affairs te hmalakna chungah lawmthu a sawi bawk.

Pu Lalthangkima, AE, SW&TA hnen atangin Technical Report ngaihthlak a ni a He Girl Hostel sakna Project Cost hi Rs 350 Lakhs niin, Contractor chu Phoko Builders, Aizawl a ni a. Kum 2020 October atanga sak tan niin hna zawh hun hi January ni 28, 2023 a ni. A zau zawng hi 904.79 sq.m (i.e.9739.08 feet bual) a ni.

He hun hi Pi Zodingpuii, Director SW& TA chuan kaihruaiin, Rev. J.Lalbiaknia ZMC Chaplain in hunserh a hmang a. Pu K. Liantlinga Ex-MLA leh Vice Chairman Social Welfare Board leh Dr. John Zohmingthanga Director ZMC leh a thawhpui te pawh telin, Pi C. Zodinpuii Joint Director, SW&TA in lawmthu sawiin hun hnung a chhang a ni.