3425/2022-2023

Dated Serchhip, the 31st January, 2023: Vawiin khan Pu Robert Romawia Royte, Minister, Tourism, Sports & Youth Services, ICT, etc., chuan Thenzawl Auditorium Rs. 918 Lakh senga sak chu a hawng.

A hawnna inkhawmah hian Pu Robert Romawia Royte chuan, hun rei deuh tak ata tawha hawn kan rilruk reng thin Thenzawl Auditorium thar kan hawng thei ta hi a lawmawm hle a, he Hall tha tak bul lo tantu bialtu MLA hmasa Pu Lal Thanhawla chungah lawmthu ka sawi a, kan Chief Minister zahawm tak Pu Zoramthanga'n, 'sawrkar hmasate bul lo tan tawh hmasawnna hna thate chu kan chhunzawm zel dawn' tia a lo sawi thin tawh tihhlawhtlinna pakhat a ni a, Golf Course te pawh a ni, heng lo pawh hi thil dang tam tak kan chhunzawmin kan tihlawhtling a, ka lawm hle a ni, a ti. Tourism Department hi department te tak te a ni a, chuti chung chuan tun kum li chhung hian hripui karah hmasawnna engemawzat kan thawk ve niin ka hria a, mumal takin Responsible Tourism Policy, Rules leh Acts te kan nei taa, kawng fel fai tak zawh tur kan duang chhuak a. Hemi behchhan hian hmasawnna hnathawhna turte pawh Central atangin kan hmu chho zel a ni, a ti. Thenzawl pawh a hmunhma ten a zirin a rem em em a, heng tun hnaia kan hawn Golf Course te, Wellness & Spa Centre te leh vawiina mi Auditorium changkangte bakah hian thil tha tak tak dang pawh a la rawn kal zel dawn a, a bul kan la tan laih laih chauh zawk a ni. Tunah hian External Aided Fund hi Rs. 1000 crores zet a thuphungin kan hmu tawh a, a hmanna tur kan duang chho mek a, Tourism hmasawnna tur tha tak tak kan la sa chho mup mup dawn a ni, a ti. Pu Robert Romawia Royte hian Thenzawl Badminton Club hnenah Court Carpet a pek tur thu sawiin, Thenzawl Higher Secondary School te hnenah Football leh Net a pe nghal a ni.

He huna khualzahawm Pu TC Pachhunga, Vice Chairman, Tourism Development Board pawhin thusawiin, Thenzawlin Auditorium changkang tak, Aizawl pawhin kan neih phak loh in nei hi ka lawmpui tak zet che u a, tangkai taka hmang turin ka duhsak che u a ni. Tunhma Thenzawl ka ngaihtuaha, World Bank kawngpui a tlang hmaa he khaw nuam leh mawi takin hmasawnna a hmuh theih loh dan te. Nimahsela, World Bank kawng a tlang hnua Thenzawl leh a tlangdung khuaten hmasawnna duhawm tinrengin an hmuh chhoh dante ka ngaihtuah hian ka rilru a hlim em em a, a ropui tak zet a ni, a ti.

He Auditorium tha leh changkang tak sak dan Technical Report hi Er. H. Lalnghinglova, Sr. EE, PWD Project Division II in a pe a. A sakna hi chi hniha sanction a ni. A building bulpui ber hi kum 2015 March khan Rs. 499.99 lakh in sak tan a ni a, he sum hmang hian a building leh a tualzawl te, building chhung Electric zam fel te, Tuizem leh thil dangte thawh a ni a, Contractor hi Pu Zothankhuma, Zotlang, Aizawl a ni. Hna hi 25.4. 2016 ah a tana niin ni 30.3. 2019 ah khan a zova. Hemi hnu hian hman theiha peih turin a thawhbelhna (Additional Estimate) atan hian Mizoram sawrkar vekin Rs. 417.56 lakh a sanction leh a, chu chuan a building chhehvel leh a chhung thuam thatna hrang hrang te; a hungna te, a cheina te, Light leh Sound System te, Chowkidar Quarters leh Store Room te leh thil tul dangte thawh a ni a, heng atana Architectural Design, Structural Design leh a taka thawh zawng zawng hi Mizoram PWD in a kengkawh a ni. A thawh belhna hna hi ni 25. 8. 2018 ah hna hi thawh tan niin ni 6.5.20 ah thawh zawh a ni a, Contractors hi hna chi hrang hrang thawktu mi paruk an awm a ni. A sakna atana vawiin thleng sum sen tawh chu Rs. 918 lakh vel a ni. Heng a chunga hnate bakah hian rawng hnawih leh a chhuat siamna te, tui connection hnaah te Tourism Department chuan Rs. 1.5 lakh vel an seng leh a, tunah hian 125 KVA Generator dah turin hma an la mek bawk. Auditorium Hall pui berah hian mi 758 thut theihna tur thutthleng changkang tak hun niin, a building chhuat zawl zau zawng hi 1373.5 Sqm a ni a, Catwalk hi 98 Sqm a zau neiin Auditorium leh a chhehvel thut zau zawng hi 5294.59 Sqm a ni.

Thenzawl Auditorium hawnna hi Pu Saitluanga, Director, Tourism Department in a kaihruai a, a hawnna hla Thenzawl Venghlun Kohhran Zaipawlten sain, Pi LV Lalawmpuii, Asst. Tourist Officer kaihhruaiin kalkhawm ten Responsible Tourism thutiam an sawi rual a, T. Vanlalhmangaihi'n zaia kalkhawmte awiin, Pu V. Lalengmawia, Jt. Secretary, Tourism in lawmthu sawiin hun a khar a ni.

Attachment

  • Loading attachment...